पुणे: राज्य सामाईक प्रवेश परीक्षा कक्ष अर्थात सीईटी सेलतर्फे शैक्षणिक वर्ष २०२६-२७ साठी अभियांत्रिकी अभ्यासक्रमाच्या केंद्रिभूत प्रवेश प्रक्रियेअंतर्गत जागा स्वीकृती शुल्कामध्ये सुधारणा करून यात वाढ केली होती. परंतु, विविध संघटनांकडून आलेले निवेदने व शासनाकडून आलेल्या सूचनेच्या आधारावर संबंधित शुल्कवाढ न करण्याचा निर्णय सीईटी कक्षाने घेतला आहे. त्यामुळे अखेर सीईटी सेल नरमले असल्याचे स्पष्ट झाले आहे.
मागील सात ते आठ वर्षांपासून सीईटी कक्षाने जागा स्वीकृती शुल्कामध्ये कोणतीही वाढ केली नव्हती. तसेच अनावश्यकपणे जागा रोखून धरण्याचे प्रमाण कमी करणे आणि खऱ्या अर्थाने इच्छुक विद्यार्थ्याला प्रवेशाच्या अधिक संधी उपलब्ध करून देणे हा उद्देश होता. मागील वर्षी विद्यार्थ्यांनी जवळपास अशा ३५ हजार जागा रोखून धरल्या होत्या, असे दिसून आले होते.
शैक्षणिक वर्ष २०२६-२७ पासून तंत्रशिक्षण विभागांतर्गत प्रथम वर्ष अभियांत्रिकी अभ्यासक्रमाच्या केंद्रिभूत प्रवेश प्रक्रिया अंतर्गत जागा स्वीकृती शुल्कामध्ये सुधारणा करण्यात येणार होती. यानुसार विद्यार्थ्याला केंद्रिभूत प्रवेश प्रक्रियामधील एकूण चार फेऱ्यांमध्ये कितव्यांदा जागावाटप झाल्यानंतर जागा स्वीकृती शुल्क आकारण्यात येणार होते.
यानुसार जागा स्वीकृती शुल्क प्रथमच जागावाटप झाल्यास एक हजार रुपये, सुधारणा प्रक्रियेद्वारे दुसऱ्यांदा नवीन जागावाटप होऊन ती स्वीकारल्यास दोन हजार रुपये व सुधारणा प्रक्रियेद्वारे तिसऱ्यांदा नवीन जागावाटप होऊन ती स्वीकारल्यास रुपये तीन हजार रुपये आकारण्यात येणार होते.
ही शुल्कवाढ न करण्याचा निर्णय सीईटी कक्षाने घेतला आहे. यामुळे आता विद्यार्थ्याला जागा स्वीकृती शुल्क पूर्वीप्रमाणेच एक हजार रुपयेच राहणार आहे. या निर्णयाचा फायदा राज्यातील अभियांत्रिकी अभ्यासक्रमामध्ये प्रवेश घेणाऱ्या सर्व विद्यार्थ्यांना होणार असल्याचे स्पष्ट झाले आहे.
