आळेफाटा ((जि. पुणे) ): पुढारी वृत्तसेवा आळेफाटा (ता. जुन्नर) येथे परप्रांतीय मजुराचा खून करून पसार झालेल्या खुनाच्या आरोपीने अहमदनगर मध्ये आसरा घेतला होता. तब्बल एक वर्षांनी आरोपीला जेरबंद करण्यात आळेफाटा पोलिसांना यश आले. सुधीर चंपालाल जाधव (वय ३८) असे आरोपीचे नाव आहे.
आळेफाटा पोलिसांनी दिलेल्या माहितीनुसार, आळे गावाच्या हद्दीत ३ मार्च २०२१ रोजी मोहनसिंग ननहकसिंग (वय ४०,रा. आणे, ता. जुन्नर) याचा डोक्यात सिमेंटचा ब्लॉक टाकून खून करण्यात आला होता. आळेफाटा पोलिसांनी अज्ञात व्यक्तीच्या विरुद्ध खुनाचा गुन्हा दाखल केला होता. संशयित आरोपी सुधीर चंपालाल जाधव (वय ३८, रा. विळद, जि. अहमदनगर. मुळ गाव आरंडगाव, ता.संगमनेर) हा गुन्हा घडल्यापासुन आळेफाटा परीसरातुन गायब होता.
गावी दहा ते बारा वेळा पोलिसांनी शोध घेतला. परंतु, तो सापडला नाही. दरम्यान, संशयित आरोपी अहमदनगर जिल्ह्यातील एमआयडीसीत लपला असल्याची माहिती खब-यांकडुन मिळाल्यानंतर पोलिसांनी वेषांतर करून जवळपास चार दिवस तेथे शोध घेतला. आरोपी दारू पिण्यासाठी देशी दारूच्या दुकानावर आल्यानंतर त्याला चौकशीसाठी पोलिसांनी ताब्यात घेतले. चौकशीत त्याने गुन्ह्याची कबुली दिली. आळेफाटा पोलिसांनी त्याला अटक केली. पोलिस निरीक्षक प्रमोद क्षीरसागर यांनी दिलेल्या सूचनांनुसार पोलिस हवालदार विनोद गायकवाड, भिमा लोंढे, लहानु बांगर, अमित वाळुंजे यांनी ही कामगिरी केली.
हे ही वाचलं का
