सुनील जगताप
पुणे: पुणे जिल्हा क्रिकेट असोसिएशनच्या वतीने वार्षिक सर्वसाधारण सभा आयोजित केली होती. या सभेमध्ये काही सदस्यांनी वॉकआऊट करीत सभाच नियमबाह्य असल्याचे नोटिशीद्वारे कळविले आहे. दरम्यान, असोसिएशनची ही सभा वादग््रास्त ठरली असून, संघटनेची पुढील दिशा नक्की काय आहे याचा उलगडा मात्र झालेला नाही.
या सभेबाबत ‘पीडीसीए’च्या काही सदस्यांनी कायदेशीर नोटिशीद्वारे सभेला जोरदार विरोध दर्शविला. संबंधित पदाधिकाऱ्यांची नियुक्ती 2022 ते 2025 या कालावधीसाठी होती. हा कार्यकाळ संपलेला असून, अद्याप नवीन निवडणुका झालेल्या नाहीत, त्यामुळे त्यांना सभा बोलावण्याचा कोणताही कायदेशीर अधिकार नसल्याचे दिलेल्या निवेदनात म्हटले आहे.
‘पीडीसीए’ची सर्वसाधरण सभेमध्ये मुख्य विषय हा निवडणूक घेण्याबाबतचा होता. मात्र, या सभेमध्ये पुढे काय झाले, याबाबत माहिती गुलदस्त्यात आहे. यासदंर्भात ‘पीडीसीए’चे कार्याध्यक्ष यांनी सभेमध्ये झालेल्या विषयाबाबत माहिती पाठवतो, असे सांगितले मात्र ती माहिती अद्याप देण्यात आलेली नाही. त्यामुळे नक्की या सभेमध्ये कोणते विषय आणि काय निर्णय झाला, याबाबत क्रिकेटपटूंमध्ये चर्चा रंगली आहे.
विना अधिकार बोलावलेली ही सभा आणि त्यामध्ये घेतलेले निर्णय कायदेशीरदृष्ट्या शून्य ठरणार आहेत. धर्मादाय आयुक्तांच्या परवानगीशिवाय किंवा रीतसर नवीन कार्यकारिणी निवडल्याशिवाय कोणतीही सभा घेऊ नये, असे पीडीसीएला सभेत सांगण्यात आले असून, या सभेतून दहा सदस्यांनी वॉकआऊट केले.
यशवंत भुजबळ, सदस्य, पुणे जिल्हा क्रिकेट असोसिएशन
‘पीडीसीए’च्या सर्वसाधारण सभेमध्ये जे दहा सदस्य सभेमधून बाहेर गेले, त्यांना आपल्या अडचणी अथवा म्हणणे मांडण्याची विनंती केली होती. परंतु, त्यांनी याबाबत प्रतिसाद दिला नाही. त्याचबरोबर सह्या न करता ते बाहेर पडले.
विवेक डफळ, कार्याध्यक्ष, पुणे जिल्हा क्रिकेट असोसिएशन
