PMC Election Hadapsar Issues: कोट्यवधींचा निधी मिळूनही परिसर भकासच

प्रमोद गिरी

प्रभाग क्रमांक 16 हडपसर-सातववाडी

हडपसर गावठाण आणि परिसराचा 1998 मध्ये महापालिकेत समावेश करण्यात झाला. त्यानंतर महापालिकेच्या चार पंचवार्षिक निवडणुका झाल्या. मात्र कोणत्याही नगरसेवकाने विकास आराखड्यात रस्त्यांचा परिपूर्ण विकास केला नाही. तसेच वाहतूक कोंडी, रस्त्यांची दुरवस्था, अपुरा पाणीपुरवठा यासह विविध समस्यांचा नागरिकांना आजही सामना करावा लागत आहे. यामुळे गेल्या काळात महापालिकेकडून कोट्यवधींचा निधी मिळूनही हा प्रभाग अद्यापही भकास असल्याची भावना नागरिकांकडून व्यक्त होत आहे.(Latest Pune News)

प्रभागात वाहतुकीची समस्या गंभीर असून, नागरिकांना दररोज वाहतूक कोंडीला सामोरे जावे लागत आहे. ठिकठिकाणी रस्त्यांची दुरवस्था झाल्याने वाहतूक कोंडीत भर पडत आहे. कमी दाबाने आणि अनियमित होणाऱ्या पाणीपुरवठ्यामुळे रहिवासी त्रस्त झाले आहेत. पाटबंधारे विभागाच्या दोन कालव्यांमुळे परिसराला कचराकुंडीचे स्वरूप प्राप्त झाले आहे. काही ठिकाणी सांडपाणी वाहिन्यांची दुरवस्था झाल्याने दुर्गंधीयुक्त पाणी रस्त्यांवर वाहत असल्याचे चित्र दिसून येत आहे.

हडपसर गावठाण परिसरात वाहनांच्या पार्किंगची व्यवस्था नाही. भाजी मंडईची दुरवस्था, अतिक्रमणे, फ्रंट मार्जिनमधील अतिक्रमणांकडे महापालिका प्रशासनाचे दुर्लक्ष होत आहे. गेल्या 28 वर्षांत रस्त्यांचे रुंदीकरण का झाले नाही, असा सवालही नागरिक उपस्थित करीत आहेत. ससाणेनगर-हडपसर रस्त्यावर डी-मार्टजवळ 2012 साली पुलाचे उद्घाटन करण्यात आले. मात्र हे कामही अर्धवट अवस्थेत आहे

हडपसर गावठाण परिसरासह ससाणेनगर, काळे बोराटेनगर, सातववाडी, गोंधळेनगर, विठ्ठलनगर हा भाग 1998 साली महापालिकेत समोवश करण्यात आला. त्यानंतर महापालिकेच्या चार पंचवार्षिक निवडणुका झाल्या. परंतु कोणत्याही नगरसेवकाने विकसित आराखड्यातील रस्त्यांच्या विकासासाठी प्रयत्न केला नसल्याचे नागरिकांचे म्हणणे आहे.

हडपसर येथील आरोग्य केंद्र आणि प्रसूतिगृहाचीही दुरवस्था झाली आहे. महापालिकेच्या दोन एक जागेत सुपर मल्टिस्पेशालिटी रुग्णालय उभारण्याची मागणी नागरिकांकडून होत आहे. मात्र, याकडे लोकप्रतिनिधी आणि प्रशासनाचे दुर्लक्ष होत आहे. राम मनोहर लोहिया उद्यानातील लहान मुलांच्या खेळणीचे साहित्यही नादुरुस्त झाले आहे. या साहित्याच्या दुरुस्तीसाठी निधी उपलब्ध नसल्याचे उद्यान विभाग सांगत आहे. सार्वजनिक स्वच्छतागृहांची अवस्थाही बिकट झाली असून, अस्वच्छतेमुळे परिसरात दुर्गंधी पसरत आहे. गाडीतळ येथील मुख्य चौकात अनधिकृत रिक्षा स्टँड असल्याने वाहतुकीला अडथळा निर्माण होते असून, कोंडीतही भर पडत आहे. जुन्या कालव्यात मोठ्या प्रमाणात कचरा साचल्याने परिसरातील नागरिकांच्या आरोग्याचा प्रश्न निर्माण झाला आहे.

प्रभागात या भागांचा समावेश

हडपसर गावठाण, ससाणेनगर,

काळे बोराटेनगर, गाडीतळ,

सातववाडी, गोंधळेनगर, उन्नतीनगर,

जयभवानी वसाहत, वेताळबाबा वसाहत,

पांढरेमळा वसाहत, अखिल डवरी समाज वसाहत, सातव प्लॉट, आकाशवाणी, विठ्ठलनगर,

पंधरा नंबर, अमर सृष्टी, लक्ष्मी कॉलनी आदी.

प्रभागातील प्रमुख समस्या

रस्त्यांवर दररोज होणारी वाहतूक कोंडी

कमी दाबाने आणि अनियमित पाणीपुरवठा

रस्त्यांची झालेली दुरवस्था

दोन्ही कालव्यांना कचराकुंडीचे स्वरूप

जुन्या आणि जीर्ण झालेल्या

मलनिस्सारण वाहिन्या

हडपसर गावठाणात वाहनांसाठी पार्किंगचा अभाव

भाजी मंडईची झालेली दुरवस्था

रस्ते, पदपथांवरीले अतिक्रमणे

गेल्या 28 वर्षांपासून रस्त्यांचे रुंदीकरण रखडलेे

ससाणेनगर-हडपसर रस्त्यावर पुलाचे काम अर्धवट

माननीयांना या प्रश्नांची द्यावी लागतील उत्तरे

प्रभागातील रस्त्यांचे रुंदीकरण आणि भूसंपादन होणार कधी?

अनधिकृत जाहिरातफलक हटवून परिसराचे विद्रूपीकरण थांबणार कधी?

पदपथ आणि रस्ते अतिक्रमणांच्या विळख्यातून मुक्त होणार कधी?

सायकल ट्रॅक आणि बीआरटीच्या दुरवस्थेकडे लक्ष देणार का?

रस्त्यांच्या रुंदीकरणासाठी भूसंपादन होणार तरी कधी?

जुनीच कामे नवीन भासविण्याचा प्रयत्न

नव्या प्रभागरचनेमुळे पूर्वीपेक्षा आता या प्रभागाचा विस्तार वाढला आहे. प्रभागातील विविध समस्या गेल्या अनेक वर्षांपासून कायम आहेत. काही माजी लोकप्रतिनिधींनी एक काम चार वेळा करून नवीन कामे केल्याचे भासवल्याचा आरोप नागरिकांनी केला आहे. मात्र, मिळालेल्या निधीतून प्रभागाचा शक्य तेवढा विकास केला असल्याचे माजी लोकप्रतिनिधी सांगत आहे.