पुणे: पदविका अभ्यासक्रमाचा निकाल अद्याप प्रलंबित असलेल्या अनेक विद्यार्थ्यांना अभियांत्रिकी आणि औषध निर्माणशास्त्र पदवी अभ्यासक्रमाच्या थेट द्वितीय वर्ष प्रवेशात अडचणी येत होत्या. यासंदर्भात राज्य सामाईक प्रवेश परीक्षा कक्षाने विद्यार्थ्यांच्या अडचणी लक्षात घेत महत्त्वाचा निर्णय घेतला आहे. निकाल प्रलंबित असलेल्या विद्यार्थ्यांना हरकती नोंदवण्याच्या कालावधीत ऑनलाइन नोंदणी करून अर्ज निश्चित करण्याची संधी उपलब्ध करून दिली आहे.
राज्यातील शासकीय, अशासकीय अनुदानित, विद्यापीठ संचालित आणि खासगी विनाअनुदानित संस्थांमधील थेट द्वितीय वर्ष अभियांत्रिकी व औषध निर्माणशास्त्र अभ्यासक्रमांच्या प्रवेश प्रक्रियेचे संपूर्ण नियोजन सीईटी कक्षाकडून केले जाते. पदविका पूर्ण केलेल्या विद्यार्थ्यांना थेट द्वितीय वर्षाला प्रवेश मिळावा, यासाठी ऑनलाइन नोंदणी, कागदपत्रे अपलोड आणि अर्ज निश्चित करण्याची मुदत देण्यात आली होती.
परंतु, अनेक विद्यार्थ्यांचे अंतिम वर्षाचे निकाल जाहीर न झाल्याने ते प्रवेशापासून वंचित राहण्याची भीती व्यक्त करत होते. याबाबत विद्यार्थी आणि पालकांनी सीईटी कक्षाला प्रत्यक्ष भेटी देऊन तसेच ईमेलद्वारे मुदतवाढीची मागणी केली होती. विद्यार्थ्यांच्या शैक्षणिक हिताचा विचार करत सीईटी कक्षाने हरकती सादर करण्याच्या कालावधीतच निकाल प्रलंबित असलेल्या विद्यार्थ्यांना नोंदणी आणि अर्ज निश्चित करण्याची अतिरिक्त संधी दिली आहे.
मात्र, या विद्यार्थ्यांना हरकती सादर करण्यासाठी स्वतंत्र अतिरिक्त मुदत दिली जाणार नाही, असे सीईटी कक्षाने स्पष्ट केले आहे. विद्यार्थ्यांनी संकेतस्थळावर अर्ज नोंदणी करणे, आवश्यक कागदपत्रांच्या स्कॅन प्रती अपलोड करणे आणि अर्जाची निश्चिती करणे आवश्यक आहे.
थेट द्वितीय वर्ष अभियांत्रिकी अभ्यास क्रमासाठी इच्छुक विद्यार्थ्यांना २८ जुलैपर्यंत तर औषध निर्माणशास्त्र अभ्यासक्रमासाठी २९ जुलैपर्यंत सीईटी कक्षाच्या अधिकृत संकेतस्थळावर अर्ज सादर करून प्रवेश प्रक्रिया निश्चित करता येणार आहे. प्रवेश प्रक्रियेसाठी कागदपत्र पडताळणी आणि इतर आवश्यक प्रक्रिया वेळापत्रकानुसार राबवली जाईल.
