चाकण: चाकण औद्योगिक वसाहतीतील कुरुळी (ता. खेड) गावात राहत्या घरात पती आणि पत्नीचे मृतदेह मिळून आल्याची धक्कादायक माहिती समोर आली आहे. कुरुळीमध्ये सोनवणेवस्ती रस्त्यावर एका इमारतीत राहणाऱ्या पति व पत्नी असे दोघांचे मृतदेह राहत्या घरात मिळून आले आहेत.
याबाबत रात्री उशिरा दक्षिण महाळुंगे पोलिस ठाण्यात गुन्हा दाखल करण्यात आला. पत्नीचा खून करून पतीने स्वतः गळफास घेऊन आत्महत्या केल्याची बाब समोर आली आहे. प्रियंका महादेव इगवे (वय 26) व महादेव मारुती इगवे (वय 35, दोघेही सध्या रा. कुरुळी, ता. खेड मूळ रा. केज जि. बीड) अशी मृतांची नावे आहेत.
याबाबत दक्षिण महाळुंगे एमआयडीसी पोलिस ठाण्यात गुरुवारी (दि. 13) रात्री उशिरा गुन्हा दाखल करण्यात आला. याप्रकरणी प्रियंका हिचे वडील बंडू आत्माराम धुमाळ (वय 58, रा. शिवनी, जि. बीड) यांनी दिलेल्या फिर्यादीवरून त्यांचा जावई महादेव इगवे याच्यावर गुन्हा दाखल करण्यात आला आहे. सदरची घटना गुरुवारी पहाटे चार वाजण्याच्या पूर्वी घडली.
फिर्यादी धुमाळ यांनी दिलेल्या तक्रारीनुसार, बुधवारी (दि. 12) रात्री सव्वा अकरा ते गुरुवारी पहाटे चारच्या दरम्यान ही घटना घडली. फिर्यादीचे जावई महादेव इगवे याने फिर्यादी यांची मुलगी प्रियंका हिचे कुणाशी तरी प्रेमसंबंध असल्याच्या संशयातून तिचा गळा आवळून खून केला. त्यानंतर त्याने स्वतः देखील गळफास घेऊन आत्महत्या केली.
याबाबतचा तपास दक्षिण महाळुंगे एमआयडीसी पोलिस करीत आहेत. दरम्यान, ज्या खोलीत ही घटना घडली, त्याच खोलीत फरशीवर या घटनेबाबत काही मजकूर लिहिला असल्याची बाब समोर आल्याचे समजते.
