Vidyanand Bapat Noise Pollution: गणेशोत्सवाच्या काळात डीजे आणि ध्वनिक्षेपकांच्या वाढत्या आवाजाविरोधात आक्रमक भूमिका घेणारे विद्यानंद बापट आता गणेशोत्सव संपल्यानंतरही आपला लढा सुरूच ठेवणार आहेत. ध्वनिप्रदूषणाचा प्रश्न केवळ उत्सवापुरता मर्यादित न राहता त्यावर कायमस्वरूपी तोडगा निघावा, यासाठी कायद्यात बदल करण्याच्या दिशेने प्रयत्न करणार असल्याचे त्यांनी स्पष्ट केले आहे.
गणेशोत्सवादरम्यान पुण्यातील विविध भागांमध्ये ध्वनिप्रदूषणाचा मुद्दा चर्चेत आला होता. डीजे आणि मोठ्या आवाजातील ध्वनिक्षेपकांमुळे नागरिकांना होणारा त्रास लक्षात घेऊन बापट यांनी प्रशासनाकडे वारंवार तक्रारी केल्या. आता याच मुद्द्याला व्यापक स्वरूप देत केंद्राच्या पातळीवर कायद्यात आवश्यक बदल करण्यासाठी पाठपुरावा करण्याचा त्यांचा मानस आहे.
ध्वनिप्रदूषणाच्या नियमांमध्ये अधिक कठोरता आणण्याची गरज असल्याचे बापट यांनी म्हटले आहे. त्यांच्या मते, केवळ रात्रीच्या वेळेतील ध्वनिक्षेपकांवरील निर्बंध पुरेसे नाहीत. सार्वजनिक आणि खुल्या ठिकाणी दिवसा होणाऱ्या मोठ्या आवाजावरही नियंत्रण असणे आवश्यक आहे.
यासाठी ध्वनिप्रदूषणविरोधी कायद्यात दुरुस्ती करण्यासाठी प्रयत्न करणार असल्याचे त्यांनी सांगितले. संसदेत यासंदर्भात विधेयक मांडले जावे, यासाठी काही लोकप्रतिनिधींशी संपर्क सुरू असल्याचा दावाही त्यांनी केला आहे. त्यामुळे गणेशोत्सवातील आंदोलनानंतर आता हा मुद्दा राष्ट्रीय पातळीवर नेण्याचा त्यांचा प्रयत्न असल्याचे दिसत आहे.
यंदाच्या गणेशोत्सवातील ध्वनिप्रदूषणाबाबतही बापट यांनी नाराजी व्यक्त केली. प्रशासनाकडून नियमांची अंमलबजावणी प्रभावीपणे झाली नसल्याचा त्यांचा आरोप आहे.
गणेशोत्सवाच्या काळात रात्री उशिरापर्यंत मोठ्या आवाजात डीजे व ध्वनिक्षेपक सुरू असल्याच्या तक्रारी त्यांनी केल्या. काही ठिकाणी नियमांचे पालन व्हावे यासाठी त्यांनी स्वतः ११२ या आपत्कालीन क्रमांकावर संपर्क साधल्याचे सांगितले. मात्र, विसर्जनाच्या दिवशीही ध्वनिक्षेपकांच्या आवाजावर अपेक्षित नियंत्रण दिसून आले नसल्याचे त्यांनी म्हटले.
त्यामुळे केवळ उत्सवाच्या काळात कारवाई करण्यापेक्षा ध्वनिप्रदूषणाबाबत स्पष्ट आणि कठोर नियमांची अंमलबजावणी होणे आवश्यक असल्याची भूमिका त्यांनी मांडली आहे.
दरम्यान, ध्वनिप्रदूषणाविरोधातील त्यांच्या भूमिकेमुळे विद्यानंद बापट राजकारणात प्रवेश करणार असल्याच्या चर्चांना काही काळापासून वेग आला होता. ॲड. असीम सरोदे यांनी सोशल मीडियावर केलेल्या भाष्यानंतर पदवीधर मतदारसंघातून बापट निवडणूक लढवू शकतात, अशी चर्चा सुरू झाली होती.
मात्र, या चर्चांना बापट यांनी स्पष्टपणे नकार दिला आहे. सध्या तरी राजकीय क्षेत्रात प्रवेश करण्याचा आपला कोणताही विचार नसल्याचे त्यांनी सांगितले.
राजकारणात प्रवेश केल्यानंतर विचार मांडताना विविध प्रकारच्या मर्यादा येऊ शकतात, असे त्यांचे म्हणणे आहे. त्यामुळे सध्या कोणत्याही राजकीय पक्षाशी किंवा निवडणुकीशी जोडले जाण्याऐवजी सामाजिक प्रश्नांवर काम करण्यावरच आपला भर राहणार असल्याचे त्यांनी स्पष्ट केले.पुढील लढा ध्वनिप्रदूषणाविरोधातच
गणेशोत्सव संपला असला तरी ध्वनिप्रदूषणाचा मुद्दा सोडणार नसल्याचे बापट यांच्या भूमिकेतून स्पष्ट झाले आहे. कायद्यात बदल करण्यासाठी लोकप्रतिनिधींशी चर्चा, नागरिकांमध्ये जनजागृती आणि नियमांची कठोर अंमलबजावणी यासाठी पुढील काळात प्रयत्न करणार असल्याचे संकेत त्यांनी दिले आहेत.
त्यामुळे गणेशोत्सवातील डीजेच्या आवाजापासून सुरू झालेला हा मुद्दा आता कायद्यातील बदलाच्या मागणीपर्यंत पोहोचला आहे. विद्यानंद बापट यांचा पुढील लढा नेमका कसा पुढे जातो आणि त्यांच्या मागण्यांवर प्रशासन व लोकप्रतिनिधी काय भूमिका घेतात, याकडे आता लक्ष लागले आहे.
