नाशिक : मुळाणे घाटातील भीषण अपघातात ५ जण ठार; मृतांत महिला, बालकांचा समावेश

वणी कळवण रस्त्यावर मुळाणे घाटात ट्रॅक्टर ट्राॅली एका कार वर उलटल्याने कारमधील व ट्रॅक्टर ट्राॅलीतील ५ जण ठार झाले. या अपघातातील गंभीर जखमींची संख्या पाहता मृतांचा आकडा वाढण्याची भीती व्यक्त केली जात आहे. संगमनेरहून (ता. दिंडोरी) कनाशी येथे जात असताना हा अपघात घडला.

मजुरांनी भरलेला ट्रॅक्टरवरील चालकाचा ताबा सुटल्याने ट्रॅक्टर ट्राॅली पलटी झाली. त्यातील १७ जणांपैकी पाच जणांचा जागेवर मृत्यू झाला. अपघाताची माहिती मिळताच वणी पोलीस तसेच ग्रामस्थ मदतीसाठी सरसावले आहेत. जखमींना वणी ग्रामीण रुग्णालयात आणण्यात आले. सर्वजण जळगाव जिल्ह्य़ातील असल्याचे सांगण्यात येत आहे. रस्त्याचे काम करणारे मजुर ट्रॅक्टर ट्राॅलीतून कनाशीकडे जाताना हा अपघात झाला. जखमींवर वणी ग्रामीण रुग्णालयात उपचार केले जात आहे. त्यातील काही गंभीर जखमी असल्याने मृतांची संख्या वाढण्याची शक्यता आहे. वणी शहरातील खाजगी डाॅक्टरांनी ग्रामीण रुग्णालयात जाऊन जखमींवर उपचार करत आहेत. गंभीर जखमींना नाशिकच्या शासकीय रुग्णालयात पाठवण्यात आले आहे. तर वणी पोलीस, वणी ग्रामस्थ मदतकार्य करीत आहेत.

वैशाली बापू पवार (४,रा. उंदिरखेडा), बेबाबाई रमेश गायकवाड (४०, रा.अंजनेरा), सरला बापू पवार (४५, रा.उंदिरखेडा ), आशाबाई रामदास मोरे (४०,रा. अंजनेरा), रामदास बळीराम मोरे (४८, रा. अंजनेरा), पोपट गिरीधर पवार (४०, रा. उंदिरखेडा) हे पाच जण अपघातात मृत्यूमुखी झाले असून सर्व जळगाव जिल्ह्यातील पारोळा तालुक्यातील रहिवासी होते. तर उर्वरीत सोळा जखमी हे अंजनेरा, हिंगोणा, उंदिरखेडा, कुसुंबा, जामनेर व मिराड येथील रहिवाशी असून त्यांना रूग्णालयात दाखल करण्यात आले आहे.