नगर तालुका: नगर तालुक्यात ठिकठिकाणी बिबट्याचा वावर आणि मानवावरील हल्ल्यांचे प्रमाण वाढत चालले आहे. खारेकर्जुने शिवारात बिबट्याने पाच वर्षांच्या चिमुकलीचा बळी घेतल्याच्या घटनेनंतर दोनच दिवसांनी निंबळक शिवारात एका आठ वर्षांच्या मुलावर बिबट्याने हल्ला केला. त्यात मुलगा गंभीर जखमी झाला आहे. गेल्या काही दिवसांतच कोपरगावजवळ महिला आणि चिमुकलीचा आणि नगर तालुक्यात एका चिमुकलीचा बिबट्यांनी बळी घेतला. आज (शुक्रवारी) सायंकाळी निंबळक येथे मुलावर हल्ला केला. त्यामुळे शेतकरी आणि ग्रामीण भागातील सर्वच रहिवासी प्रचंड दहशतीखाली वावरत असून, या बिबट्याचं करायचं तरी काय? असा सवाल केला जात आहे. निंबळक परिसरातील संतप्त गावकरी आक्रमक झाले असून, हा बिबट्या नरभक्षक बनला असून त्याला ठार मारा, अशी भूमिका त्यांनी घेतली आहे.
खारेकर्जुन येथे बुधवारी (दि.12) सायंकाळी घरासमोर खेळत असलेल्या रियंका सुनील पवार या पाच वर्षीय मुलीला बिबट्याने आईसमोरून उचलून नेले होते. मोठी शोधमोहीम राबविल्यानंतर गुरुवारी तिचा मृतदेह सापडला. त्यानंतर ग्रामस्थांनी गाव बंद ठेवून बिबट्याचा बंदोबस्त करण्याची मागणी केली होती. तसेच बिबट्या जेरबंद होईपर्यंत अंत्यविधी करणार नसल्याचीही आक्रमक भूमिका घेतली होती.
या घटनेमुळे बिबट्याला पकडण्यासाठी खारेकर्जुने परिसरात विविध ठिकाणी सहा पिंजरे लावण्यात आले आहेत. तसेच वन विभागाची विशेष टीम व वरिष्ठ अधिकारी, कर्मचारी घटनास्थळी ठाण मांडून बिबट्याची शोधमोहीम राबवत आहेत. त्यातच याच परिसरात बिबट्याने कुत्र्यावर हल्ला करण्याचा प्रयत्न केल्याचा व्हिडिओ सोशल मीडियावर व्हायरल झाला आहे. यावरून बिबट्या वनविभागाच्या कर्मचाऱ्यांना हुलकावणी देत असल्याचे दिसून येते.
निंबळक, खारेकर्जुने, इसळक तसेच परिसरातील ग्रामस्थ बिबट्याच्या प्रचंड दहशतीखाली आहेत. बिबट्यांकडून चिमुकल्यांवर हल्ल्याच्या घटना खूप दुर्दैवी आहेत. सदर बिबट्याचा तत्काळ बंदोबस्त करावा अथवा नरभक्षक बनलेल्या बिबट्याला ठार मारावे, अशी मागणी पंचायत समितीचे माजी उपसभापती दिलीप पवार यांनी केली आहे.
रक्तबंबाळ अवस्थेत रणवीर घरी आला तेव्हा...
निंबळक परिसरातील वैष्णवमाता मंदिराशेजारी असणाऱ्या कोतकर वस्तीवर शुक्रवारी सायंकाळी राजवीर रामकिसन कोतकर (वय 8) या मुलावर बिबट्याने हल्ला केला. राजवीर घराबाहेर खेळत असताना बिबट्याने त्याच्यावर झडप घातली. राजवीरला जबड्यात पकडून बिबट्याने पळ काढला. बिबट्याने त्याची मान आपल्या जबड्यात पकडली होती. तशा अवस्थेत राजवीरने आरडाओरडा करत स्वतःची सुटका करून घेतली. रक्तबंबाळ आणि घाबरलेल्या अवस्थेत राजवीर घरी आला. रक्तबंबाळ राजवीरला पाहून घरातील सर्वजण पूर्ण हादरून गेले होते. त्यांनी त्याला तत्काळ नगरच्या खासगी रुग्णालयात दाखल केले. राजवीरच्या मानेला, गळ्यावर तसेच शरीरावर इतरत्र बिबट्याच्या दातांचे व्रण पंजाच्या नखांचे ओरखडे स्पष्ट दिसत आहेत. याबाबत रुग्णालयाशी संपर्क साधला असता राजवीरची प्रकृती स्थिर असल्याचे सांगण्यात आले.
निंबळक, इसळक, खारे कर्जुने उद्या बंद
बिबट्याच्या हल्ल्यात मुलगा गंभीर जखमी झाल्याची घटना घडल्याने परिसरात भीतीचे वातावरण आहे. घटनेचा निषेध म्हणून उद्या ग्रामस्थांच्या वतीने या गावांमध्ये बंद पाळण्यात येणार असून, कसळे वस्ती बायपास चौकात आंदोलन करण्यात येणार असल्याची माहिती युवा उद्योजक अजय लामखडे यांनी दिली.
