Mumbai-Pune Highway Traffic Jam: मुंबई–पुणे जुन्या महामार्गावर आज सकाळी अचानक मोठी वाहतूक कोंडी झाली. मुंबईहून पुण्याच्या दिशेने जाणारा एक अवजड कंटेनर मोरवाडी परिसरातील ग्रेड सेपरेटरखाली अडकला आणि काही क्षणांतच संपूर्ण मार्गावर वाहनांच्या लांबच लांब रांगा लागल्या.
सकाळच्या गर्दीच्या वेळेत ही घटना घडल्याने प्रवासी, कर्मचारी आणि शाळेत जाणाऱ्या विद्यार्थींना त्रास झाला. कंटेनरची उंची ग्रेड सेपरेटरपेक्षा जास्त असल्याने तो मध्येच अडकला. त्यामुळे सर्व वाहतूक पूर्णपणे ठप्प झाली. काही वेळातच पिंपरी–चिंचवड शहरातून जाणाऱ्या जुन्या महामार्गावर दोन्ही बाजूंनी वाहनांच्या रांगा लागल्या.
हा कंटेनर एका खासगी लॉजिस्टिक कंपनीचा असल्याची प्राथमिक माहिती असून चालकाला उंचीचा अंदाज न आल्यामुळे ही घटना घडल्याचे सांगितले जात आहे.
घटनेची माहिती मिळताच पिंपरी–चिंचवड वाहतूक पोलिसांनी तात्काळ घटनास्थळी धाव घेतली. पुण्याच्या दिशेने जाणारी वाहतूक पर्यायी मार्गांनी वळवण्यात आली. मात्र सकाळी कामावर निघालेल्या अनेक नागरिकांना तब्बल तासाभरापेक्षा अधिक वेळ वाहतूक कोंडीत अडकून राहावे लागले.
कंटेनर काढण्यासाठी क्रेन मागवण्यात आली असून पोलिस आणि महामार्ग प्रशासन युद्धपातळीवर प्रयत्न करत आहेत. कंटेनर रिकामा करून तो बाहेर काढण्याचे काम सुरू आहे. तोपर्यंत हा मार्ग पूर्णपणे मोकळा होण्यास वेळ लागणार असल्याचे पोलिसांकडून सांगण्यात आले.
दरम्यान, या घटनेमुळे मोरवाडी, पिंपरी, चिंचवड आणि आसपासच्या भागात अंतर्गत रस्त्यांवरही मोठी गर्दी झाली. अनेक वाहनचालकांनी सोशल मीडियावर व्हिडिओ शेअर करत परिस्थितीची माहिती दिली.
वाहतूक पोलिसांनी नागरिकांना आवाहन केले आहे की, शक्य असल्यास जुना मुंबई–पुणे महामार्ग टाळावा आणि पर्यायी मार्गांचा वापर करावा. तसेच अवजड वाहन चालकांनी ग्रेड सेपरेटर, उड्डाणपूल आणि अंडरपासची उंची तपासूनच प्रवास करावा, जेणेकरून अशा घटना पुन्हा घडणार नाहीत. या घटनेने पुन्हा एकदा महामार्गावरील अवजड वाहनांच्या नियोजनाचा प्रश्न ऐरणीवर आला आहे.
