Election : राज्यात नगरपंचायत निवडणूक जाहीर, आचारसंहिता लागू, ‘या’ दिवशी मतदान
मुंबई : पुढारी वृत्तसेवा : Election : राज्यातील ३२ जिल्ह्यांतील १०५ नगरपंचायतींच्या सार्वत्रिक निवडणुकांसाठी २१ डिसेंबर रोजी मतदान तर २२ डिसेंबर मतमोजणी होईल. त्यासाठी संबंधित नगरपंचायतींच्या क्षेत्रात आजपासून आचारसंहिता लागू झाली आहे. राज्यात महाविकास आघाडीचे सरकार आल्यानंतरची गेल्या दोन वर्षांमधील ही सर्वात मोठी लढाई असणार आहे. या निवडणुकीच्यनिमित्ताने भविष्यात आघाडीतील तीन मित्रपक्ष एकत्र लढणार की स्वबळावर दंड थोपटणार, हे स्पष्ट होणार आहे. राज्य निवडणूक आयुक्त यू. पी. एस. मदान यांनी बुधवारी या निवडणुकांची घोषणा केली.
राज्यातील एप्रिल २०२० ते मे २०२१ या कालावधीत मुदत संपलेल्या ८१ आणि डिसेंबर २०२१ मध्ये मुदत संपणाऱ्या १८ तसेच नवनिर्मित ६ अशा एकूण १०५ नगरपंचायतींच्या प्रत्येकी १७ सदस्यपदांच्या सार्वत्रिक निवडणुकीसाठी मतदान होईल. त्यासाठी १ ते ७ डिसेंबर या कालावधीत नामनिर्देशनपत्रे स्वीकारण्यात येतील. ४ व ५ डिसेंबर रोजी सुट्टी असल्याने नामनिर्देशनपत्रे स्वीकारण्यात येणार नाहीत. नामनिर्देशनपत्रांची छाननी ८ डिसेंबर रोजी होईल. मतदान २१ डिसेंबर रोजी सकाळी ७.३० ते सायंकाळी ५.३० पर्यंत होईल. २२ डिसेंबर रोजी सकाळी १० वाजल्यापासून मतमोजणी सुरू होईल. (Election)
राखीव जागेवर निवडणूक लढविणाऱ्या उमेदवारांना नामनिर्देशनपत्रासोबत जात प्रमाणपत्र व जातवैधता प्रमाणपत्र सादर करणे आवश्यक राहील. कोविड संदर्भात केंद्र व राज्य शासनाने ठरवून दिलेल्या निकषानुसार व आवश्यक त्या उपाययोजना करून या निवडणुकांचा कार्यक्रम राबवावा, असे निर्देश संबंधित जिल्हाधिकाऱ्यांना देण्यात आले आहेत, अशी माहितीही मदान यांनी दिली. (Election)
निवडणूक (Election) होत असलेल्या नगरपंचायतींची जिल्हानिहाय नावे
ठाणे- मुरबाड व शहापूर. पालघर- तलासरी, विक्रमगड, मोखाडा. रायगड- खालापूर, तळा, माणगाव, म्हसळा, पोलादपूर, पाली (नवनिर्मित).
रत्नागिरी- मंडणगड, दापोली.
सिंधुदुर्ग- कसई-दोडामार्ग, वाभवे-वैभववाडी, कुडाळ.
पुणे- देहू (नवनिर्मित). सातारा- लोणंद, कोरेगाव, पाटण, वडूज, खंडाळा, दहीवडी, सांगली- कडेगाव, खानापूर, कवठे-महाकाळ,
सोलापूर- माढा, माळशिरस, महाळूंग-श्रीपूर (नवनिर्मित), वैराग (नवनिर्मित), नातेपुते (नवनिर्मित).
नाशिक- निफाड, पेठ, देवळा, कळवण, सुरगाणा.
धुळे- साक्री, नंदुरबार- धडगाव-वडफळ्या-रोषणमाळ.
अहमदनगर- अकोले, कर्जत, पारनेर, शिर्डी. जळगाव- बोदवड. औरंगाबाद- सोयगाव. जालना- बदनापूर, जाफ्राबाद, मंठा, घनसावंगी, तीर्थपुरी (नवनिर्मित).
परभणी- पालम. बीड- केज, शिरूर-कासार, वडवणी, पाटोदा, आष्टी. लातूर- जळकोट, चाकूर, देवणी, शिरूर-अनंतपाळ.
उस्मानाबाद- वाशी, लोहारा बु..
नांदेड- नायगाव, अर्धापूर, माहूर.
हिंगोली- सेनगाव, औंढा-नागनाथ. अमरावती- भातकुली, तिवसा. बुलडाणा- संग्रामपूर, मोताळा,. यवतमाळ- महागाव, कळंब,
बाभुळगाव, राळेगाव, मारेगाव, झरी जामणी. वाशीम- मानोरा. नागपूर- हिंगणा, कुही. वर्धा- कारंजा, आष्टी, सेलू, समुद्रपूर.
भंडारा- मोहाडी, लाखनी, लाखांदूर. गोंदिया- सडकअर्जुनी, अर्जुनी, देवरी, सावली.
चंद्रपूर- पोंभुर्णा, गोंडपिपरी, कोरपना, जिवती, सिंदेवाही-लोनवाही, मुलचेरा. गडचिरोली- एटापल्ली, कोरची, अहेरी, चामोर्शी, सिरोंचा, धानोरा, कुरखेडा आणि भामरागड.
विविध जिल्ह्यातील सात नगरपरिषदा- नगरपंचायतींच्या रिक्त जागांसाठीदेखील २१ डिसेंबर रोजी मतदान होणार आहे. शिरोळ (६ अ), नागभीड (४ अ), जत (५ ब), सिल्लोड (१२ अ), फुलंब्री (२ आणि ८), वानाडोंगरी ( ६ अ) आणि ढाणकी (१२आणि २३).
‘या’ महानगरपालिकांतील रिक्तपदांसाठी पोटनिवडणूक जाहीर https://t.co/mHNoT32AsJ #mnc #byelections2021
— Pudhari (@pudharionline) November 24, 2021