मुंबई; पुढारी ऑनलाईन : शिवसेनेचे बंडखोर आमदार व मंत्री एकनाथ शिंदे तसेच त्यांच्या सोबत असणाऱ्या बंडखोर आमदारांसाठीचे परतीचे दरवाजे बंद झाले आहेत. आम्ही त्यांना सन्मानाने परत येण्यास सांगितले; पण त्यांनी परतीचा मार्ग स्वीकारला नाही. आमच्या संपर्कात २१ आमदार आहेत. त्यामुळे महाविकास आघाडी आपले बहुमत सिद्ध करेल. त्यामुळे एकनाथ शिंदे यांच्यासोबतची चर्चा आता संपली आहे, अशी माहिती शिवसेनेचे खासदार संजय राऊत यांनी दिली.
एका वृत्तवाहिनीशी बोलताना संजय राऊत म्हणाले, आम्ही बंडखोर आमदारांनी व एकनाथ शिंदे यांच्याशी वारंवार चर्चा करुन परत येण्याची विनंती केली होती. एकनाथ शिंदे हे शिवसेनेतील मोठे नेते आहेत. त्यांनी परत यावे हे सर्वच शिवसैनिकांना इच्छा आहे. तसेच मुख्यमंत्री उद्धव ठाकरे यांनी व्यक्तीश: त्यांना परत येण्याबद्दल विनंती केली. सर्वांना वाटत होतं की, ते सर्व आमदार परत येतील काल पर्यंत त्यांच्यासाठी आमचे दरवाजे उघडे होते; पण, आता एकनाथ शिंदे यांच्यासाठी आमचे दरवाजे बंद झाले आहेत. त्यांच्या सोबतची चर्चा आता संपल्याचे राऊत यावेळी म्हणाले.
जे बंडखोर आमदार आसामला गेले आहेत. त्यातील २१ आमदार आमच्या संपर्कात आहेत. ते त्यांच्या स्वखुशीने गेलेले नाहीत. त्यांच्यावर दबाव आहेत. त्यांना तेथे एकप्रकारे कैद करुन ठेवले आहे. ते मुंबईत येताच आमच्यात सामील होतील आणि महाविकास आघाडी आपले बहुमत सिद्ध करेल, असा विश्वास यावेळी संजय राऊत यांनी व्यक्त केला.
बंडखोर आमदारांवर कारवाई करण्याचे काम सुरु झाले आहे. येत्या २४ तासांमध्ये बंडखोरांची मंत्रीपदे बरखास्त होतील, असे मत राऊत यांनी व्यक्त केले. तसेच आतापर्यंत ७ बंडखोरांवर नाटीस बजावण्याची प्रक्रीया सुरु झाली आहे. तसेच १६ बंडखोर आमदारांना नाेटीसा बजावण्यात आल्या आहेत, असेही त्यांनी सांगितले.
