Minor Girl Assault Kej
केज: उन्हाळी सुट्टीत आजोळी मामाकडे आलेल्या एका १३ वर्षीय अल्पवयीन मुलीवर तिच्याच २५ वर्षीय चुलत मामेभावाने बळजबरीने अत्याचार केल्याची संतापजनक घटना केज तालुक्यातील एका गावात घडली आहे. नराधम आरोपीने मुलीचे तोंड आणि हात बांधून हे कृत्य केले. या प्रकरणी केज पोलिसांनी आरोपीला बेड्या ठोकल्या आहेत.
माजलगाव तालुक्यातील एका गावात राहणारी आणि आठवीत शिकणारी ही १३ वर्षीय मुलगी २२ मे रोजी तिच्या आत्यासोबत केज तालुक्यातील दैठणा येथे मामाच्या गावी आली होती. २५ मे रोजी दुपारी ३ वाजण्याच्या सुमारास मुलगी घरात एकटीच झोपली होती. याच दरम्यान तिचा २५ वर्षीय चुलत मामेभाऊ तिथे आला. त्याने आजीबद्दल विचारणा केली असता, आजी शेतात सरपण (लाकडे) आणायला गेल्याचे मुलीने सांगितले. घरात कोणी नसल्याचे पाहून तो आत येऊ लागला. मुलीने त्याला विरोध केला, तरीही तो जबरदस्तीने घरात घुसला आणि त्याने आतून कडी लावून घेतली.
दरवाजा बंद केल्यामुळे मुलगी ओरडू लागली, तेव्हा आरोपीने तिचे तोंड रुमालाने दाबून बांधले. तिने सुटका करून घेण्याचा आणि कडी उघडण्याचा प्रयत्न केला, मात्र आरोपीने तिला मारहाण करत तिचे दोन्ही हात दोरीने बांधले आणि तिच्यावर अत्याचार केला.
कुकृत्य केल्यानंतर शेतातून आजी परत आल्याची चाहूल लागताच आरोपीने मुलीचे हात सोडले आणि 'कोणाला काही सांगितल्यास जीवे मारून टाकेन' अशी धमकी दिली. त्यानंतर तो अंगावर गोधडी ओढून घरातच एका कोपऱ्यात लपून बसला.
आजी अंगणात येताच पीडित मुलीने कसाबसा तोंडाचा रुमाल काढला आणि दरवाजा उघडून आजीला हाक मारली. आजी घरात येताच गोधडीत लपलेल्या आरोपीने आजीला जोराचा धक्का दिला आणि तिथून पळ काढला. घाबरलेल्या आजीने तात्काळ या घटनेची माहिती मुलीच्या मामाला आणि आई-वडिलांना दिली.
या धक्कादायक प्रकारानंतर २६ मे रोजी कुटुंबीय केज पोलीस ठाण्यात पोहोचले. पीडित अल्पवयीन मुलीच्या तक्रारीवरून २७ मे रोजी रात्री उशिरा आरोपीविरुद्ध पोक्सो कायद्याच्या कलम ४ आणि ६ अंतर्गत गुन्हा दाखल करण्यात आला.
घटनेचे गांभीर्य ओळखून पोलीस निरीक्षक स्वप्नील उनवणे यांच्या मार्गदर्शनाखाली पोलीस उपनिरीक्षक उमेश निकम यांनी रात्रीच आरोपीच्या गावात धाड टाकून त्याला ताब्यात घेतले. या घटनेचा पुढील तपास सहाय्यक पोलीस निरीक्षक महेश क्षीरसागर करत आहेत.
