अहमदनगर; पुढारी वृत्तसेवा : शहरातील विविध ठिकाणावरून सायकली चोरी करणार्या अट्टल चोराला कोतवाली पोलिसांनी जेरबंद केले आहे. चोरीला गेलेल्या 55 हजार रूपये किमतीच्या 11 सायकली कोतवाली पोलिसांनी जप्त केल्या आहेत. दिनेश शेषराव व्यवहारे (वय 50 वर्षे, रा. दातरंगेमळा, अहमदनगर) असे आरोपीचे नाव असून, त्याच्याविरुद्ध गुन्हा दाखल करून अटक करण्यात आली आहे.
शहरातील सांगळेगल्ली, गाडगीळ पटांगण, दातरंगे मळा, बागरोजा हडको, नालेगाव या परिसरातून चोरी गेलेल्या सायकल कोतवाली पोलिसांनी हस्तगत केल्या. शहरातील विविध ठिकाणावरून दिनेश व्यवहारे याने सायकली चोरी केल्या असून, तो या सायकली विक्री करण्यासाठी गाडगीळ पटांगणात येणार असल्याची माहिती कोतवाली पोलिसांना मिळाली होती. या माहितीच्या आधारे कोतवाली पोलिसांनी आरोपीला पकडण्यासाठी गाडगीळ पटांगण परिसरात सापळा लावला होता.
आरोपी दिनेश व्यवहारे चोरीची सायकल विक्री करण्यासाठी आला असता त्याला कोतवाली पोलिसांनी पकडले. आरोपीची कसून चौकशी केली असता शहरातील 11 सायकली चोरल्याची कबुली त्याने दिली. पोलिस निरीक्षक चंद्रशेखर यादव, पोलीस अंमलदार तनवीर शेख, गणेश धोत्रे, योगेश भिंगारदिवे, सलीम शेख, रियाज इनामदार, अभय कदम, संदीप थोरात, अमोल गाढे, कैलास शिरसाठ, सागर मिसाळ, सोमनाथ राऊत, सुजय हिवाळे, अतुल काजळे यांच्या पथकाने ही कारवाई केली.
ज्या नागरिकांच्या सायकली चोरीला गेल्या, त्यांनी कोतवाली पोलिसांशी संपर्क करून आणि सायकलीची ओळख पटवून सायकल घेऊन जाण्याचे आवाहन पोलिस निरीक्षक चंद्रशेखर यादव यांनी केले. पोलिस नाईक कैलास शिरसाठ, मुकुंद दुधाळ, आणि सागर मिसाळ यांच्याशी संपर्क करून सायकली घेऊन जाण्याचे सांगण्यात आले आहे.
हेही वाचा
