अहमदनगर, पुढारी ऑनलाईन :"आपल्याला मूल होण्यासाठी तू माझ्या मित्रासोबत शरीरसंबंध ठेव. बाहेर कुणाला सांगितले तर तुला जीवे मारून टाकेन", असे धमकावत पत्नीवर अत्याचार (Rape) करणाऱ्या पती आणि त्याच्या मित्राविरोधात विवाहितेने पाथर्डी पोलीस ठाण्यात फिर्याद दिली आहे. सविस्तर वृत्त असे की, ही धक्कादायक घटना अहमदनगर जिल्ह्यातील पाथर्डीत घडली आहे.
पीडित महिलेवर पतीने आणि त्याच्या मित्रानेच अत्याचार केल्याची ही घटना घडली आहे. पीडित महिलेच्या फिर्यादीवरून पती आणि त्याचा मित्र, या दोघांवर पोलीस ठाण्यात गुन्हा दाखल करण्यात आला आहे. याप्रकरणी पोलिसांनी दोघांनी अटक केली आहे.
वर्षभरापूर्वीच विवाहितेचे लग्न झालेले होते. सुरुवातीच्या ८ महिन्यातच खूप त्रास होऊ लागला होता. त्यामुळे महिला आई-वडिलांकडे राहायला गेली. मागील महिन्यात संबंधित महिला ही पाथर्डी येथे तिच्या आजोबांकडे राहण्यास आली होती. त्यानंतर पती आजोबांच्या घरी जाऊन महिलेला घरी नांदायला घेऊन आला.
त्यानंतर २२ सप्टेंबरच्या रात्री १० वाजण्याच्या सुमारास घरी पत्नी झोपलेली असताना मित्रासोबत पती घरी आला. "आपल्याला मूल होण्यासाठी शरीरसंबंध ठेव. यावेळी पत्नीने नकार दिला. मात्र, पती आणि मित्राने बळजबरीने दोन गोळ्या चारल्या. त्यानंतर दोघांनी महिलेवर अत्याचार केला, असं महिलेने फिर्यादित म्हंटलेलं आहे.
पुन्हा दुसऱ्या दिवशी म्हणजेच २३ सप्टेंबरला रात्री १० वाजता दोघे आले आणि पुन्हा दोघांनी मिळून विवाहितेवर अत्याचार (Rape) केला. महिलेने हा सर्व प्रकार फोनवरून आई-वडिलांना सांगितला. त्यानंतर पोलीस ठाण्यात ही फिर्याद दिली. सहायक पोलीस निरीक्षक रामेश्वर कायदे हे संबंधित गुन्ह्याचा तपास करत आहेत.
