US Iran Ceasefire News: अमेरिका आणि इराण यांच्यातील तणाव पुन्हा एकदा वाढताना दिसत आहे. अमेरिकेचे राष्ट्राध्यक्ष डोनाल्ड ट्रम्प यांनी सध्याचा युद्धविराम फार काळ टिकणार नाही, असा स्पष्ट इशारा दिला आहे. त्यांनी सांगितले की, वॉशिंग्टनच्या वेळेनुसार बुधवारी संध्याकाळपर्यंत हा युद्धविराम थांबू शकतो, ज्यामुळे परिस्थिती आणखी चिघळण्याची शक्यता आहे.
ट्रम्प यांनी युद्धविराम वाढण्याची शक्यता कमी असल्याचेही स्पष्ट केले. कोणताही करार न झाल्यास तणाव वाढू शकतो, असे संकेत त्यांनी दिले आहेत. या पार्श्वभूमीवर आंतरराष्ट्रीय पातळीवर चिंता व्यक्त केली जात आहे.
दरम्यान, शांतता करार करण्यासाठी पाकिस्तानमध्ये बैठक आयोजित करण्याची तयारी सुरू आहे. अमेरिकेचे उपराष्ट्राध्यक्ष जे.डी. व्हान्स पुन्हा इस्लामाबादला जाण्यास तयार असल्याची माहिती व्हाइट हाऊसकडून देण्यात आली आहे. मात्र, इराणकडून अजून कोणतेही प्रतिनिधीमंडळ पाकिस्तानकडे रवाना झालेले नाही, अशी माहिती इराणी सरकारी माध्यमांनी दिली आहे.
या सगळ्या घडामोडींमध्ये इस्रायलचे पंतप्रधान बेंजामिन नेतान्याहू यांच्या भूमिकेबाबतही चर्चा सुरू आहे. काही अहवालांनुसार, इस्रायलने अमेरिकेवर लष्करी कारवाईसाठी दबाव टाकल्याचा आरोप केला जात होता. मात्र ट्रम्प यांनी हे आरोप फेटाळून लावले आहेत.
सध्या परिस्थिती अत्यंत नाजूक असून, पुढील काही दिवसांत काय निर्णय होतो यावर या संघर्षाचे भवितव्य ठरणार आहे. जर चर्चा यशस्वी झाली नाही, तर युद्धविराम संपल्यानंतर पुन्हा संघर्ष सुरु होण्याची शक्यता नाकारता येत नाही.
