Yusuf Pathan Mumbai Case: मुंबईत एका किरकोळ वादातून मारहाणीची घटना घडली आहे. माजी क्रिकेटपटू आणि खासदार युसूफ पठाण यांच्या सासऱ्यासह मेहुण्याला पोलिसांनी अटक केली आहे. रस्त्यावर साचलेल्या पाण्यामुळे सुरू झालेला वाद थेट हाणामारीपर्यंत पोहोचल्याने हा प्रकार घडला आहे.
घटनेची सुरुवात अगदी छोट्या कारणाने झाली. रस्त्यावर साचलेल्या पाण्यातून एक कार गेल्यानंतर ते पाणी युसूफ खान नावाच्या व्यक्तीवर उडालं. या घटनेनंतर त्यांच्यात वाद झाला. या वादात युसूफ पठाण यांचा मेहुणा शोएब खान सहभागी झाला आणि त्याने युसूफ खान यांच्यावर हल्ला केल्याचा आरोप आहे.
युसूफ खान यांनी दिलेल्या माहितीनुसार, ते पोलिसांत तक्रार देण्यासाठी जात असताना पठाण यांचे सासरे खालिद खान आणि इतर नातेवाईकांनी पुन्हा त्यांच्यावर हल्ला केला. या वेळी परिस्थिती आणखी चिघळली.
या हल्ल्यात आरोपींनी काठ्या आणि बेसबॉल बॅटचा वापर केल्याचा आरोप आहे. यात तक्रारदाराच्या नातेवाईकांना गंभीर दुखापत झाली आहे. एका व्यक्तीचा हात फ्रॅक्चर झाला असून आणखी एक व्यक्ती गंभीर जखमी अवस्थेत असल्याची माहिती आहे.
या प्रकरणात पोलिसांनी तातडीने कारवाई करत खालिद खान आणि शोएब खान यांना अटक केली. त्यांना न्यायालयात हजर केल्यानंतर भायखळा येथील आर्थर रोड कारागृहात न्यायालयीन कोठडीत पाठवण्यात आलं आहे. या प्रकरणात सहभागी असलेला शहबाज खान सध्या फरार असून पोलिस त्याचा शोध घेत आहेत. पोलिसांनी सीसीटीव्ही फुटेजच्या आधारे तपास सुरू केला आहे.
