Iran Supreme Leader Mojtaba Khamenei : इराणमध्ये गेल्या काही महिन्यांपासून तीव्र राजकीय आणि लष्करी संघर्ष सुरू आहे. अशातच इराण सरकारने अधिकृतपणे घोषणा केली आहे की, देशाचे नवे सर्वोच्च नेते मोजतबा खामेनी पुढील आठवड्यात जाहीरपणे सर्वांसमोर येतील. तेहरानमध्ये त्यांचे दिवंगत वडील अयातुल्ला अली खामेनी यांच्यासाठी शोक सभेचे आयोजन ते करणार आहेत. मात्र, या घोषणेनंतरही मोजतबा खामेनेई स्वतः वैयक्तिकरित्या या कार्यक्रमाला उपस्थित राहणार की नाही, हे अद्याप पूर्णपणे स्पष्ट झालेले नाही.
या अधिकृत नोटीसनुसार, दिवंगत इराणी नेत्यासाठी ही शोकसभा २३ जुलै रोजी संध्याकाळी ५ ते ७ या वेळेत आयोजित केली जाईल. निमंत्रण पत्रिकेत दिवंगत नेत्याचा उल्लेख "शहीद मुजाहिद इमाम" असा करण्यात आला आहे. ही घोषणा जगभरातील माध्यमांचे लक्ष वेधून घेत आहे, कारण मोजतबा खामेनी यांनी वडिलांच्या निधनानंतर इराणच्या सर्वोच्च पदाची धुरा सांभाळल्यापासून ते एकदाही जाहीरपणे समोर आलेले नाहीत.
गेल्या आठवड्यात तेहरानच्या 'इमाम खुमैनी ग्रँड मोसल्ला'मध्ये देशाच्या इतिहासातील सर्वात मोठ्या शोकसभांपैकी एक सभा झाली. तेव्हाही मोजतबा खामेनी तिथे उपस्थित नव्हते. सरकारी टेलिव्हिजनवर दाखवण्यात आले होते की, इराणचे दिवंगत सर्वोच्च नेते अयातुल्ला अली खामेनी यांचे तीन मुलगे- मुस्तफा, मीसम आणि मसूद खामेनेई यांनी (अंत्यसंस्काराच्या) प्रार्थनेचे नेतृत्व केले आणि ते शवपेटीजवळ उभे होते. अयातुल्ला अली खामेनी यांच्यासह त्यांची मुलगी, जावई, सून आणि त्यांच्या अवघ्या १४ महिन्यांच्या नातीच्या शवपेट्याही प्रार्थनेसाठी एकत्र ठेवण्यात आल्या होत्या. नव्या सर्वोच्च नेत्याच्या अनुपस्थितीमुळे त्यावेळी अनेक प्रश्न आणि तर्कवितर्कांना उधाण आले होते.
मोजतबा कॅमेऱ्यासमोर आले नसले, तरी काही दिवसांपूर्वी त्यांनी लेखी स्वरूपात आपले पहिले जाहीर पत्रक प्रसिद्ध केले होते. अमेरिकेचे राष्ट्राध्यक्ष डोनाल्ड ट्रम्प यांच्या कडक इशाऱ्यानंतर अवघ्या काही तासांतच त्यांनी थेट आपल्या वडिलांच्या मृत्यूचा बदला घेण्याची शपथ घेतली आहे.
फेब्रुवारीमध्ये युद्ध सुरू झाल्यापासून मोजतबा खामेनी यांना कोणत्याही जाहीर व्यासपीठावर पाहिले गेलेले नाही. आपल्या ताज्या वक्तव्यात त्यांनी असा दावाही केला आहे की, इस्लामिक रिपब्लिकने (इराण) जागतिक नेते आणि अधिकाऱ्यांची एक 'हिट लिस्ट' तयार केली आहे, ज्यांना लक्ष्य केले जाणार आहे. १७ जून रोजी झालेला युद्धविराम करार पूर्णपणे मोडीत निघाल्यानंतर आणि वॉशिंग्टन व तेहरानमधील तणाव पुन्हा एकदा शिगेला पोहोचला असतानाच हे शाब्दिक युद्ध तीव्र झाले आहे. गेल्या काही दिवसांत दोन्ही देशांनी एकमेकांवर थेट हल्ले केले असून आरोप-प्रत्यारोप वाढवले आहेत, ज्यामुळे मध्य पूर्वेमध्ये (मिडल ईस्ट) मोठ्या युद्धाचा धोका निर्माण झाला आहे. आता संपूर्ण जगाचे लक्ष २३ जुलैकडे लागले आहे. मोजतबा खामेनी इराणची जनता आणि जागतिक माध्यमांसमोर येणार का, याचे उत्तर त्याच दिवशी मिळणार आहे.
