पुढारी ऑनलाईन डेस्क
ब्रिटनमध्ये लासा फिव्हरची (Lassa fever) तीन रुग्णांना लागण झाली आहे. तर एकाचा मृत्यू झाला आहे. दरम्यान एका वृत्तानुसार, गेल्या आठवड्यात लासा फिव्हरने ज्याचा मृत्यू झाला ते नवजात बाळ होते. ब्रिटनच्या आरोग्य यंत्रणेने (UK Health Security Agency) बेडफोर्डशायर येथे लासा फिव्हरने एका रुग्णाचा मृत्यू झाल्याच्या वृत्ताला पुष्टी दिली आहे.
लासा फिव्हरचे तिन्हीही रुग्ण पश्चिम आफ्रिकेतून प्रवास करुन आलेले आहेत. केंब्रिज युनिव्हर्सिटी हॉस्पिटल्स एनएचएस ट्रस्टने पाठवलेल्या एका ईमेलचा हवाला देऊन बीबीसीने (BBC) याबाबत वृत्त दिले आहे. या वृत्तानुसार, ल्यूटन आणि डन्स्टेबल हॉस्पिटलमधील एका नवजात बालकाचा लासा फिव्हरने मृत्यू झाला आहे. दरम्यान, जे रुग्णांच्या संपर्कात आले आहेत अशा हॉस्पिटलमधील शेकडो फ्रंटलाइन कर्मचाऱ्यांना खबरदारीचा उपाय म्हणून आयसोलेट होण्यास सांगण्यात आले आहे.
लासा विषाणूचा आफ्रिकेच्या काही भागांमध्ये संसर्ग झाला आहे. पण ब्रिटनमध्ये याचे संक्रमण होण्याचा धोका खूप कमी असल्याचे ब्रिटनमधील आरोग्य यंत्रणेचे म्हटले आहे.
याआधी ब्रिटनमध्ये १९८० मध्ये लासा फिव्हरच्या ८ प्रकरणांची नोंद झाली होती. त्यानंतर आता पुन्हा तीन रुग्णांना याची लागण झाली आहे. कोरोनाच्या ओमायक्रॉन व्हेरियंटचा धोका कमी होऊन संपूर्ण जग पूर्वपदावर येत आहे. याच दरम्यान आता लासा फिव्हर (Lassa Fever) विषाणूचा धोका निर्माण झाला आहे. ब्रिटनमध्ये लासा फिव्हरची तीन रुग्णांना लागण झाली आहे. त्यातील एकाचा मृत्यू झाला असल्याने चिंता व्यक्त केली जात आहे.
याबाबत ब्रिटनमधील आरोग्य यंत्रणेने (UK Health Security Agency) म्हटले आहे की, लासा विषाणूमुळे मृत्यू होण्याची ही ब्रिटनमधील पहिलीच घटना आहे. या विषाणूची लागण झाल्यानंतर मानवात सुरुवातीला कोणतीही लक्षणे दिसून येत नाहीत. पण हा विषाणू धोकादायक असून यामुळे बाधित व्यक्तीचा मृत्यूदेखील होऊ शकतो. नायजेरियात यामुळे दोन परिचारिकांच्या मृत्यूनंतर या विषाणूबाबत माहिती समोर आली होती.
या विषाणूमुळे संक्रमित झाल्यानंतर १ ते ३ आठवड्यानंतर लक्षणे दिसून येतात. सौम्य ताप, थकवा, अशक्तपणा, डोकेदुखी अशी याची लक्षणे आहेत. त्याशिवाय रक्तस्त्राव, श्वास घेण्यास त्रास होणे, उलटी, चेहऱ्याला सूज येणे, छाती, पाठ आणि पोटात दुखणे आदी लक्षणे दिसून येतात. या विषाणूच्या संपर्कात आलेले लोक बहिरेपणाचेही बळी ठरू शकतात.
हा विषाणू उंदरातून मानवात प्रवेश करतो. उंदराच्या मलमूत्राद्वारे दूषित झालेले अन्न सेवन केल्यामुळे हा विषाणू वेगाने संक्रमित होतो. रुग्णाला स्पर्श करणे अथवा गळाभेट घेतल्यानंतर हा विषाणू पसरत नाही. पण संक्रमित व्यक्तीच्या लाळेसारख्या द्रवातून इतरांमध्ये तो पसरू शकतो.
हे ही वाचा :
