LPG eKYC Rules Explained: एलपीजी (LPG) गॅस ग्राहकांसाठी आधार बायोमेट्रिक eKYC अनिवार्य करण्यात आल्याच्या बातम्या सध्या सोशल मीडियावर आणि काही माध्यमांमध्ये मोठ्या प्रमाणावर फिरत आहेत. मात्र, केंद्र सरकारने या संदर्भात स्पष्टीकरण दिले असून सर्व ग्राहकांसाठी eKYC बंधनकारक नसल्याचे सांगितले आहे. सरकारने सांगितले की, ही कोणतीही नवीन सूचना नसून आधीपासूनच सुरू असलेल्या प्रक्रियेचा भाग आहे. यामागचा उद्देश अधिकाधिक ग्राहकांनी eKYC पूर्ण करावी हा आहे.
सरकारच्या माहितीनुसार, eKYC ही अट केवळ त्या LPG ग्राहकांसाठी लागू आहे ज्यांनी अद्याप eKYC पूर्ण केलेले नाही. ज्या ग्राहकांनी आधीच eKYC केली आहे, त्यांना पुन्हा प्रक्रिया करण्याची आवश्यकता नाही.
प्रधानमंत्री उज्ज्वला योजना (PMUY) अंतर्गत येणाऱ्या ग्राहकांसाठी eKYC आर्थिक वर्षात फक्त एकदाच करणे आवश्यक आहे. तेही फक्त DBT (Direct Benefit Transfer) अनुदान मिळवण्यासाठी, विशेषतः 7 सिलेंडरनंतर 8वा आणि 9वा सिलेंडर घेताना हा नियम लागू होतो.
सरकारने स्पष्ट केले की, eKYC प्रक्रिया अत्यंत सोपी असून ती घरबसल्या मोफत करता येते. त्यामुळे ग्राहकांना कोणतीही अतिरिक्त फी देण्याची गरज नाही. या प्रक्रियेमुळे गॅस सिलेंडरच्या पुरवठ्यावर कोणताही परिणाम होणार नाही, असेही सरकारने स्पष्ट केले आहे. म्हणजेच, eKYC न केल्यास तातडीने गॅस मिळणे बंद होणार नाही.
सरकारच्या मते, eKYC मुळे पारदर्शकता वाढते, योग्य लाभार्थी ओळखणे सोपे होते आणि बनावट किंवा डुप्लिकेट ग्राहकांना आळा बसतो. तसेच LPG चा गैरवापर आणि काळाबाजारही रोखता येतो.
LPG eKYC संदर्भात पसरत असलेल्या गैरसमजांना पूर्णविराम देत सरकारने स्पष्ट केले की, सर्व ग्राहकांसाठी ही प्रक्रिया बंधनकारक नाही. मात्र, ज्यांनी अद्याप eKYC केलेली नाही त्यांनी ती पूर्ण करणे आवश्यक आहे.
