पुणे : चालू आर्थिक वर्षातील एप्रिल ते जानेवारी या दहा महिन्यात वाहन निर्यात २४.४ टक्क्यांनी वाढून ५३ लाख ९५ हजारांवर गेली आहे. तीनचाकी वाहनांची निर्यात ५२ टक्क्यांनी वाढली असून, चारचाकी आणि दुचाकी वाहनांच्या निर्यातीत अनुक्रमे १७.६ आणि २३.७ टक्क्यांनी वाढ झाली आहे. गतवर्षी याच कालावधीत ४३.३५ लाख वाहनांची निर्यात झाली होती.
चालू आर्थिक वर्षात सर्वच श्रेणीतील वाहन निर्यातीत वाढ झाली आहे. वस्तू आणि सेवा करातील (जीएसटी) कपातीनंतर वाढीची गती वाढली आहे. एप्रिल ते जानेवारी या कालावधीत कारची निर्यात ३.३८ वरून ३.७६ लाखांवर गेली असून, यूव्ही कारची निर्यात २.८९ वरून ३.६२ लाखांवर गेली आहे. व्हॅनची निर्यात ७,५०९ वरून ८,७३६वर गेली आहे. सोसायटी ऑफ इंडियन ऑटोमोबाइल मॅन्युफॅक्टरर्स (सियाम)ने ही आकडेवारी शुक्रवारी (दि.१३) जाहीर केली.
प्रवासी तीनचाकी वाहनांची निर्यात २.४८ वरून ३.७९ लाखांवर झेपावली आहे. तब्बल ५२.४ टक्क्यांनी निर्यात वाढली आहे. तर, मालवाहतूक करणाऱ्या तीनचाकी वाहनांची निर्यात ३,१२९ वरून ४,४४०वर गेली आहे. एकूण तीनचाकी वाहनांची निर्यात २.५१ वरून ३.८३ लाखांवर गेली आहे. दुचाकींची निर्यात ३४.४२ वरून ४२.५९ लाखांवर गेली आहे. दुचाकींच्या निर्यातीत एकूण २३.७ टक्क्यांची वाढ झाली आहे. स्कूटर्सची निर्यात ४.९० वरून ५.५९ लाखांवर गेली असून, मोपेडची निर्यात ५,५७४ वरून १७,८६२वर गेली आहे. तर, मोटरसायकलची निर्यात २९.४६ वरून ३६.८२ लाखांवर गेली आहे. मोटरसायकलची निर्यात २५ टक्क्यांनी वाढली आहे.
एप्रिल ते जानेवारी या दहा महिन्यात चारचाकी वाहनांची विक्री ३४.९० वरून ३७.०६ लाखांवर गेली आहे. त्यात युटिलिटी व्हेईकलचा (यूव्ही) वाटा २४.५२ लाख आहे. चीनचाकी वाहनांची विक्री ६.२० वरून ६.८५ लाखांवर गेली आहे. त्यात प्रवासी तीनचाकींचा वाटा ५.६७ लाख आहे. दुचाकींची विक्री १.६५ वरून १.७८ कोटींवर गेली आहे. त्यात मोटरसायकलचटा वाटा १ कोटी ७ लाख आहे. खालोखाल ६६.२६ लाख स्कूटर्सची विक्री झाली आहे.
एप्रिल ते जानेवारी या कालावधीत वाहनांचे उत्पादन २.५० वरून २.७४ कोटींवर गेले आहे. चारचाकी वाहनांचे उत्पादन ४०.८२ वरून ४४.२५ लाखांवर गेले आहे. त्यात यूव्ही वाहनांचा वाटा तब्बल २७.९८ लाख आहे. चीनचाकी वाहनांचे उत्पादन ८.७९ वरून १०.७५ लाखांवर गेले आहे. त्यात प्रवासी तीन चाकींचा वाटा ९.५३ लाख आहे. दुचाकींचे उत्पादन दोन कोटींवरून २.१९ कोटींवर वाढले आहे. त्यात मोटरसायकलचा वाटा तब्बल १.४४ कोटी आहे.
