तुम्ही नोकरी करत असाल आणि तुमचं पीएफ खातं असेल, तर ही बातमी तुमच्यासाठी आहे. आपल्या सगळ्यांसाठी एक गुड न्यूज आहे. ईपीएफओने (EPFO) नुकतंच एक भन्नाट पोर्टल सुरू केलं आहे, ज्याचं नाव आहे 'पासबुक लाइट'. या पोर्टलमुळे आता तुमचं पीएफ खातं तपासणं, त्यातले पैसे काढणं आणि बाकीची कामं खूप सोपी झाली आहेत.
आधी काय व्हायचं, आपल्याला पीएफची माहिती, पैसे किती जमा झाले, किती काढले, हे सगळं बघण्यासाठी वेगवेगळ्या वेबसाइटवर जावं लागायचं. पण आता ईपीएफओने त्यांच्या मेन पोर्टलवर (https://unifiedportal-mem.epfindia.gov.in/memberinterface/) हे 'पासबुक लाइट' नावाचं फीचर जोडलं आहे.
आता तुम्ही वेगळ्या पोर्टलवर न जाता, एकाच जागी तुमचं पासबुक, जमा केलेले पैसे, काढलेले पैसे आणि शिल्लक रक्कम, सगळं काही कमी वेळात पाहू शकता. यामुळे तुमचा वेळ आणि मेहनत दोन्ही वाचणार आहे.
तुम्ही जेव्हा नोकरी बदलता, तेव्हा तुमचं पीएफ खातं फॉर्म १३ भरून नवीन कंपनीत ट्रान्सफर होतं. आधी या ट्रान्सफरचं सर्टिफिकेट (ज्याला ॲनेक्सचर के म्हणतात) फक्त पीएफ ऑफिसमध्ये मिळायचं. पण आता ईपीएफओने हे सर्टिफिकेट तुम्ही तुमच्या पोर्टलवरूनच पीडीएफ (PDF) फाईलमध्ये डाउनलोड करण्याची सोय केली आहे.
यामुळे काय फायदा होईल?
ट्रॅकिंग सोपं झालं: तुम्ही तुमचा पीएफ ट्रान्सफर अर्ज कुठे पोहोचला, हे ऑनलाइन ट्रॅक करू शकता.
चूक नाही होणार: नवीन खात्यात तुमचे पैसे आणि नोकरीचा कालावधी बरोबर अपडेट झाला आहे की नाही, हे तुम्ही स्वतः तपासू शकता.
डिजिटल रेकॉर्ड: तुमच्याकडे कायमसाठी तुमच्या पीएफ खात्याचा डिजिटल पुरावा राहील.
तुम्ही पीएफमधून पैसे काढण्यासाठी किंवा इतर कामांसाठी अर्ज केला असेल, तर त्याला मंजुरी मिळायला खूप वेळ लागत होता. कारण यासाठी अनेक मोठ्या अधिकाऱ्यांची सही (मंजुरी) लागायची. पण आता ईपीएफओने नियम बदलले आहेत. मोठ्या अधिकाऱ्यांचे अधिकार आता खालच्या पातळीवरील अधिकाऱ्यालाही दिले आहेत.
यामुळे तुमची सगळी कामं, जसे की पैसे काढणे, ट्रान्सफर करणे, हे आता सुपरफास्ट होणार आहे. थोडक्यात, ईपीएफओने आपल्या ग्राहकांसाठी काम अधिक सोपं आणि पारदर्शक करण्याचा प्रयत्न केला आहे. हा बदल आपल्या सगळ्यांसाठी खूप चांगला आहे.
