पुढारी ऑनलाईन डेस्क
अठरापगड जाती-जमातीच्या शूर मावळ्यांना सोबत घेत शिवरायांनी जाज्वल्य इतिहास घडविला. (वीर मुरारबाजी पुरंदरची युद्धगाथा) सह्याद्रीच्या दऱ्या-खोऱ्यात लढाया करणारे शूरवीर आणि पराक्रमी मावळे स्वराज्यासाठी जीवाची बाजी लावण्यासाठी सदैव तयार असतं. अशा पराक्रमी आणि निष्ठावंत मावळ्यांमध्ये रणधुरंधर नरवीर मुरारबाजी देशपांडे हे नाव अग्रक्रमाने घ्यावे लागते. स्वराज्याच्या इतिहासात पुरंदरचे 'काळभैरव' म्हणून ओळख असणारे मुरारबाजी देशपांडे यांची यशोगाथा मराठी रुपेरी पडद्यावर येण्यास सज्ज होत आहे. पुढच्या वर्षी १७ फेब्रुवारी २०२३ ला हा चित्रपट प्रदर्शित होत आहे. (वीर मुरारबाजी पुरंदरची युद्धगाथा)
शिवराज्याभिषेक दिनाचे औचित्य साधून या चित्रपटाची पहिली झलक प्रदर्शित करण्यात आलीय. 'फत्तेशिकस्त' आणि 'पावनखिंड' चित्रपटाच्या घवघवीत यशानंतर आलमंड्स क्रिएशन्स व ए. ए. फिल्म्स यांनी 'वीर मुरारबाजी…पुरंदरची युद्धगाथा' चित्रपटाची घोषणा केली आहे. या चित्रपटाची निर्मिती अजय आरेकर, अनिरूद्ध आरेकर, भाऊसाहेब आरेकर यांची आहे.
१६६५ च्या आषाढात मिर्झाराजे जयसिंग आणि सरदार दिलेरखान यांनी पुरंदर किल्ल्याला वेढा घातला. त्यावेळी पुरंदरचे किल्लेदार असलेले मुरारबाजी देशपांडे निवडक ७०० मावळ्यांसह दिलेरखानाच्या फौजेवर चालून गेले. 'न भूतो न भविष्यती' असा पराक्रम केला.
पुरंदरच्या लढाईतल्या पराक्रमाने मुघलांना भयभीत करुन सोडणाऱ्या मुरारबाजी देशपांडे यांची ही यशोगाथा आजच्या पिढीला चित्रपटाच्या माध्यमातून समजावी यासाठी हा चित्रपट आम्ही घेऊन येत आहोत. अशी माहिती निर्माते अजय आरेकर यांनी सांगितले.
अधिकाधिक तरुणांपर्यंत स्वराज्याचा प्रेरणादायी इतिहास पोहचवायचा आहे. त्यासाठी आम्ही प्रयत्नशील आहोत. 'पावनखिंड' सारखा वीर मुरारबाजी…पुरंदरची युद्धगाथा' चित्रपटही भव्यदिव्य असेल. चित्रपटासंबंधित इतर घोषणा लवकरच करण्यात येणार आहे.