पिंपरी : पिंपरी-चिंचवड महापालिकेसाठी चार सदस्यीय 32 प्रभागरचना अंतिम झाली आहे. त्यानंतर आरक्षण सोडत कधी निघणार याकडे सर्वांच्या नजरा लागल्या आहेत. प्रभागातील अनुसूचित जाती (एससी) व अनुसूचित जमातीच्या (एसटी) लोकसंख्येवरून त्या वर्गासाठी राखीव असलेल्या एकूण 23 जागा कोणत्या प्रभागात असणार हे स्पष्ट झाले आहे. त्यावरून राजकीय गणिते निश्चित केली जात आहेत.(Latest Pimpri chinchwad News)
प्रभागरचना सोमवारी (दि.6) अंतिम झाली आहे. केवळ सहा प्रभागात बदल झाले असून, उर्वरित 26 प्रभाग पूर्वीप्रमाणेच आहेत. असे असले तरी, सहा प्रभागातील लोकसंख्या बदलल्याने प्रभागातील एससी आणि एसटी आरक्षणात बदल झाले आहेत. एससी व एसटीची लोकसंख्या वाढल्याने त्या प्रभागात एसटी व एससीचे आरक्षण पडू शकते. हक्काच्या जागेवर आरक्षण पडणार असल्याने खुल्या गटातील तसेच, ओबीसी गटातील उमेदवारांनी आजूबाजूच्या प्रभागात चाचपणी सुरू केली आहे. तसेच, कुटुंबातील महिला सदस्याला निवडणूक उतरविण्याचा पर्याय समोर आणला आहे.
दरम्यान, आरक्षण सोडतीनंतर प्रत्यक्ष प्रभागातील चित्र अधिक सुस्पष्ट होणार आहे. त्यानंतर पुढील रणनिती ठरविण्याचा निर्णय माजी नगरसेवकांसह, पदाधिकारी व इच्छुकांनी घेतला आहे. काठावर असलेले इच्छुक त्यानंतरच कोणत्या पक्षाच्या तिकिटावर लढायचे हे ठरविणार असल्याचे राजकीय सूत्रांकडून सांगितले जात आहे.
असे आहे 128 जागेवरील आरक्षण
पिंपरी-चिंचवड शहराची लोकसंख्या (2011 च्या जनगणनेनुसार)
एकूण लोकसंख्या-17 लाख 27 हजार 692
एससी लोकसंख्या- 2 लाख 73 हजार 820
एसटी लोकसंख्या-36 हजार 535
आरक्षण सोडतीसाठी पालिका तयार
राज्य निवडणूक आयोगाकडून आरक्षण सोडत काढण्याचा कार्यक्रम अद्याप जाहीर झालेला नाही. त्याबाबत जाहीर झाल्यानंतर त्यानुसार आरक्षण सोडत घेतली जाईल. त्यासाठी महापालिकेच्या निवडणूक विभागाने तयारी करून ठेवली आहे, असे महापालिकेच्या निवडणूक विभागाचे सहाय्यक आयुक्त अविनाश शिंदे यांनी सांगितले.
असे आहे 128 जागेवरील आरक्षण
अनुसूचित जाती (एससी) 20
अनुसूचित जमाती (एसटी) 3
इतर मागास वर्ग (ओबीसी) 35
सर्वसाधारण महिला (ओपन) 35
सर्वसाधारण (ओपन) 35
‘एससी’साठी या 20 प्रभागांत असू शकेल आरक्षण
एससी प्रवर्गासाठी प्रभाग क्रमांक 19, 13, 30, 25, 23, 20, 9, 11, 16, 21, 10, 32, 29, 27, 31, 26, 8, 4, 17 आणि 3 हे एकूण 20 प्रभागात आरक्षण पडण्याची दाट शक्यता आहेत. एससी लोकसंख्येनुसार या प्रभागातील एका जागेवर महिला किंवा पुरूष एससी प्रवर्गाचे आरक्षण पडू शकेल. या 20 पैकी 10 जागा या महिलांसाठी राखीव असणार आहेत.
‘एसटी’साठी आरक्षण असलेले हे तीन प्रभाग
प्रभाग क्रमांक 4, 29 आणि 30 या तीन प्रभागांत एसटी प्रवर्गाचे आरक्षण पडण्याची दाट शक्यता आहे. त्यातील दोन जागा या महिलांसाठी आरक्षित असणार आहेत. या प्रवर्गात पुरुषासाठी केवळ एक जागा राखीव असणार आहे. या तीन प्रभागांत एससीसाठी एक जागा राखीव असू शकते. त्यामुळे या तीन प्रभागांतील उर्वरित दोन जागा खुल्या किंवा ओबीसी प्रवर्गासाठी असू शकतील.
दिवाळीनंतर आरक्षणाचा धमाका ?
राज्यातील जिल्हा परिषदेसह नगरपरिषद, नगरपंचायतीची आरक्षण सोडत काढण्यात आली आहे. त्यानंतर महापालिकेची आरक्षण सोडत काढण्यात येणार आहे. राज्यातील सर्वच महापालिकेची एकाच वेळी आरक्षण सोडत काढली जाईल. त्यामुळे दिवाळीनंतर आरक्षण सोडतीचा कार्यक्रम जाहीर होईल, असे अधिकाऱ्यांनी सांगितले.