नागपूर, पुढारी वृत्तसेवा : कामठी येथे रोडवर झालेल्या अपघाताच्या घटनेत सुनेसमोरच मुलासह सासऱ्याचा ट्रकच्या चाकात येऊन मृत्यू झाला. ही घटना मंगळवारी घडली. तर पोलिसांनी ट्रक चालकाला अटक केली आहे.
पोलिसांनी दिलेल्या माहितीनुसार, हुडकेश्वर रोड पिपला फाटा, गजानन नगर येथील रहिवासी रामदास परशराम वनकर (वय ६०) यांचे काही दिवसांपूर्वी नागपुरातील डॉक्टरकडे डोळ्याचे ऑपरेशन झाले होते. परंतु ते यशस्वी न झाल्याने ते मंगळवारी (दि.3) सोनार ओळी कामठीतील मुक्ता हॉस्पिटल येथे डोळ्याच्या उपचारासाठी सुनेसोबत यायला निघाले होते. घरी अडीच वर्षीय मुलगा त्रिशांत उर्फ कान्हा याला पाहायला कोणीच नसल्याने त्यालाही सोबत घेऊन गाडी क्र. (एम.एच. ४०, बी. आर. ४८८९) ॲक्टीव्हाने कामठीला जायला निघाले. कामठी मेनरोडवर ट्रकच्या चाकाखाली येऊन आजोबा आणि नातवाचा मृत्यू झाला.
घटनेच्या वेळी मृत रामदास यांची सून दामिनी रमेश वनकर दुचाकी चालवित होती. कामठीतील मोटर स्टँड चौकावरून मेनरोड मार्गे दवाखान्याकडे जात असताना जुने पोलीस स्टेशनकडून मोटर स्टॅण्डकडे येत असलेल्या टिप्पर क्र. (एम. एच. ४०, ए. के. ०२६८) हैदरी चौकाजवळ दुचाकीचा तोल जाऊन ट्रकच्या बाजूला पडली. यात ट्रकच्या मागील चाकात येऊन आजोबा व नातवाचा जागीच मृत्यू झाला. ही घटनास्थळावरून पळून जाण्याचा प्रयत्न करणारा टिप्पर चालक जितेंद्र अमरकंठक भोंगाडे (वय २४) याला नागरिकांनी चोप देत पोलिसांच्या हवाली केले.
रामदास यांना एकच मुलगा असून तो नेव्हीत आसाममध्ये नोकरीला आहे. त्यामुळे गजानन नगर, हुडकेश्वर येथे ते सूनेसह राहात होते. तेही काही वर्षांपूर्वी सीआरपीएफमधून सेवानिवृत्त झाले होते. मृतक रामदास यांना रमेश हा एकच मुलगा व रमेशला सुद्धा त्रिशांत एकच मुलगा होता. अडीच वर्षाचा त्रिशांत परिसरात कान्हा नावाने परिचित होता.
हेही वाचा