भंडारा; पुढारी वृत्तसेवा : जिल्ह्यातील भंडारा आणि लाखनी या कृषी उत्पन्न बाजार समितीच्या निवडणुकीत भाजप, राष्ट्रवादी, शिवसेना (शिंदे) गटाने वर्चस्व निर्माण केले आहे. काँग्रेसची मात्र पिछेहाट झाल्याचे चित्र आहे. भंडारा येथे दोन्ही गटाला प्रत्येकी ९ जागा मिळाल्या असून लाखनीत मात्र युतीने एकतर्फी विजय प्राप्त केला आहे.
भंडारा कृषी उत्पन्न बाजार समितीच्या निवडणुकीत ९६ टक्के तर लाखनी कृषी उत्पन्न बाजार समितीच्या निवडणुकीत ९८ टक्के मतदान झाले होते. आज सकाळी मतमोजणीची सर्वांनाच उत्सुकता होती. मतमोजणीअंती भंडारा कृषी उत्पन्न बाजार समितीत भाजप, राष्ट्रवादी आणि शिवसेना युतीला ९ आणि काँग्रेसला ९ जागा मिळाल्या. तर लाखनी कृषी उत्पन्न बाजार समितीवर काँग्रेसला ४ तर युतीला १४ जागा मिळाल्या.
या निवडणुकीत काँग्रेस प्रदेशाध्यक्ष तथा साकोली विधानसभा क्षेत्राचे आमदार नाना पटोले यांना धक्का बसल्याचे दिसून आले. लाखनी हे नाना पटोले यांच्या विधानसभा क्षेत्रात येत असल्याने याठिकाणी काँग्रेसची झालेली पिछेहाट चिंताजनक असल्याचे मानले जात आहे.
पहिल्या टप्प्यात भंडारा आणि लाखनी कृषी उत्पन्न बाजार समितीच्या निवडणुका पार पडल्या. दुसऱ्या टप्प्यातील पवनी आणि लाखांदूर बाजार समितीसाठी उद्या दि. ३० एप्रिल रोजी मतदान होणार आहे. मतदानाच्या अर्धा तासानंतर मतमोजणीला सुरुवात होणार आहे. ही निवडणुकही अत्यंत चुरशीची होणार आहे.
हेही वाचा :