पुणे: महानगरपालिकेच्या ‘स्वच्छता सप्ताह’ अभियानांतर्गत शनिवारी कसबा पेठ क्षेत्रीय कार्यालयाच्या हद्दीत विशेष 'डीप क्लीन ड्राइव्ह' राबविण्यात आली. या मोहिमेत प्रमुख मंडई, बाजारपेठा, व्यावसायिक क्षेत्रे, शासकीय इमारती, आरोग्य कोठ्या तसेच क्षेत्रीय कार्यालय परिसराची सखोल स्वच्छता करण्यात आली.
दिवंगत लोकनेते अजित पवार यांच्या जयंतीनिमित्त शहरभर सुरू असलेल्या 'स्वच्छता सप्ताह' उपक्रमाचा भाग म्हणून परिमंडळ क्रमांक पाच अंतर्गत ही मोहीम राबविण्यात आली. महापौर मंजुषा नागपुरे आणि महापालिका आयुक्त नवल किशोर राम यांच्या मार्गदर्शनाखाली, तर घनकचरा व्यवस्थापन विभागाचे उपआयुक्त संतोष वारुळे आणि परिमंडळाचे उपआयुक्त माधव जगताप यांच्या नेतृत्वाखाली मोहिमेचे नियोजन करण्यात आले.
या अभियानात प्रभाग क्रमांक २२, २३ आणि २४ मधील प्रमुख मंडई, व्यापारी संकुले, शासकीय कार्यालये, आरोग्य केंद्रे आणि सार्वजनिक परिसराची स्वच्छता करण्यात आली. मोहिमेदरम्यान नगरसेवक विशाल धनवडे, पल्लवी जावळे यांच्यासह विविध मान्यवर उपस्थित होते.
तसेच खड्डा गॅरेज परिसरात वृक्षारोपण आणि शालेय विद्यार्थ्यांना शालेय बॅगचे वाटपही करण्यात आले. स्वच्छता मोहिमेत प्रभाग २२ मधील गिरिधर भवन चौक, प्रभाग २३ मधील नेहरू चौक मंडई, भोरी आळी व परिसर, तसेच प्रभाग २४ मधील ऐतिहासिक कसबा गणपती मंदिर परिसर, गणेश रोड आणि प्रमुख रस्त्यांची विशेष स्वच्छता करण्यात आली.
या उपक्रमामुळे कसबा पेठेतील प्रमुख चौक आणि बाजारपेठा अधिक स्वच्छ झाल्याची प्रतिक्रिया नागरिक आणि व्यापाऱ्यांनी व्यक्त केली. शहर अधिक सुंदर आणि कचरामुक्त करण्यासाठी नागरिकांनीही स्वच्छता मोहिमेत सक्रिय सहभाग घ्यावा, असे आवाहन महापालिकेने केले आहे. मोहिमेच्या अंमलबजावणीत आरोग्य विभागाचे अधिकारी, निरीक्षक आणि मोठ्या संख्येने आरोग्य कर्मचारी सहभागी झाले होते.