बारामती: बारामती तालुका पोलिसांनी शिर्सुफळ (ता. बारामती) गावामध्ये शनिवारी (दि. २४) एकाच दिवशी अवैध दारू विक्रेत्यांविरोधात जोरदार कारवाई केली. या कारवाईत सुमारे सव्वातीन लाखांची देशी-विदेशी दारू जप्त करण्यात आली. चार ठिकाणच्या कारवाईत एकूण पाच जणांविरोधात गुन्हा दाखल करण्यात आला.
पोलिस अंमलदार नितीन ढवाण यांनी दिलेल्या फिर्यादीवरून सचिन विठ्ठल म्हेत्रे (रा. शिर्सुफळ) यांच्यावर गुन्हा दाखल करण्यात आला. म्हेत्रे यांच्याकडे देशी-विदेशी दारूच्या २ हजार ५२० रुपयांच्या २६ बाटल्या मिळून आल्या. ओळखीच्या लोकांना या दारूची चोरून विक्री केली जात होती.
दुसऱ्या कारवाईत नाना वसंत आटोळे यांच्याविरोधात गुन्हा दाखल करण्यात आला. पोलिस अंमलदार सागर देशमाने यांनी फिर्याद दिली. या कारवाईत देशी व विदेशी दारूच्या ५३ बाटल्या जप्त करण्यात आल्या. जप्त दारूची किंमत ४ हजार २९० रुपये इतकी आहे. राहत्या घराच्या आडोशाला आटोळे यांच्याकडून बेकायदेशीरपणे ही दारू विकली जात होती.
तिसऱ्या कारवाईत वेद मधुकर गायकवाड (रा. पाटस, ता. दौंड) याच्याविरोधात गुन्हा दाखल करण्यात आला. पोलिस अंमलदार अभिजित एकशिंगे यांनी फिर्याद दिली आहे. शिर्सुफळमधील तेजश्री बिअर शाॅपीसमोरील रस्त्यालगतच्या एका शटरच्या गाळ्यात ही कारवाई करण्यात आली. या कारवाईत सुमारे ५६ हजार रुपयांच्या देशी-विदेशी दारूच्या सुमारे ७०७ बाटल्या जप्त करण्यात आल्या. त्यातील काही बाटल्या सहाय्यक पोलिस निरीक्षक विक्रम पवार यांनी पंचांसमक्ष जप्त करून उर्वरित माल जागीच सील करण्यात आला.
चौथ्या कारवाईत सुखदेव हिवरकर (रा. शिर्सुफळ) व दिनेश दत्तू हजारे (रा. झारगडवाडी) यांच्याविरोधात गुन्हा दाखल करण्यात आला. पोलिस अंमलदार मनोज पवार यांनी याबाबत फिर्याद दिली. या कारवाईत २ लाख ४५ हजार रुपयांच्या विविध प्रकारच्या १ हजार ९३ दारू बाटल्या जप्त केल्या गेल्या. अंकिता बिअर शाॅपनजीक असलेल्या एका गाळ्यात दारूचा हा बेकायदा साठा पोलिसांना आढळून आला. बिअरशाॅपीचे मालक हिवरकर व कामगार हजारे या दोघांविरोधात पोलिसांनी गुन्हा दाखल केला.
