जेजुरी: माळशिरस (ता. पुरंदर) येथे प्रेयसीच्या पतीचा कोयत्याने वार करून खून करणाऱ्या आरोपीस जेजुरी पोलिसांनी अटक केली. सुशांत संदीप मापारी (रा. माळशिरस) असे त्याचे नाव आहे. तसेच त्याच्या अल्पवयीन साथीदारासही पोलिसांनी ताब्यात घेतले आहे.
जेजुरी पोलिसांनी दिलेल्या माहितीनुसार, पुरंदर तालुक्यातील राजेवाडी येथील दीपक जगताप याचा एक महिन्यापूर्वी पायल कांबळे हिच्याशी प्रेमविवाह झाला होता. पायलचा पहिला प्रियकर सुशांत मापारी याने दीपक व पायल यांना मोबाईलवर फोन करून, पायलबरोबर लग्न करायचे होते.
तुम्ही लग्न केले. तुम्हाला जिवंत सोडणार नाही अशी धमकी दिली होती. शनिवारी (दि. 13) प्रशांत याने दीपकला माळशिरस येथील रामकाठी शिवारात बोलावून घेतले. तेथे त्याच्या डोक्यात कोयत्याने वार करून खून केला.
त्यानंतर प्रशांत पळून गेला. रविवारी (दि. 14) खुनाची घटना उघडकीस आली. आरोपी प्रशांतला पकडण्यासाठी पोलिसांनी पथके रवाना केली होती. सोमवारी (दि. 15) आरोपी यवत परिसरात असल्याची माहिती पोलिसांना मिळाली.
त्यानुसार सहायक पोलिस निरीक्षक दीपक वाकचौरे, उपनिरीक्षक सर्जेराव पुजारी, महेश पाटील, हवालदार अण्णा देशमुख, तात्यासाहेब खाडे, विठ्ठल कदम, दशरथ बनसोडे, संदीप भापकर, हेमंत भोंगळे, योगेश चितारे, प्रसाद कोळेकर यांच्या पथकाने यवत परिसरातील शेतात सुशांतला अटक केली. त्याने खुनाची कबुली दिली आहे. तसेच त्याच्या अल्पवयीन साथीदारास ताब्यात घेतले.