नाशिक : पुढारी वृत्तसेवा
जिल्ह्यात उन्हाचा तडाखा कायम असताना ग्रामीण भागाला टंचाईच्या झळा बसत आहेत. जिल्ह्यातील 15 पैकी 10 तालुक्यांमध्ये टँकरचा फेरा सुरू आहे. तब्बल 125 गावे-वाड्यांना 58 टँकरच्या सहाय्याने पाणीपुरवठा करण्यात येत आहे.
धरणांचा जिल्हा अशी ओळख असलेल्या नाशिकमध्ये गेल्या काही वर्षांपासून उन्हाळ्यात तीव्र पाणीटंचाई भासत आहे. पाण्यासाठी जनतेच्या नशिबी वणवण फिरणे आले आहे. त्यातच यंदाच्या वर्षी उन्हाचा चटका अधिक जाणवत आहे. त्यामुळे ग्रामीण भागात जनतेला तहान भागविण्यासाठी टँकरवर अवलंबून राहावे लागत आहे. टंचाईची भीषणता बघता स्थानिक स्तरावर प्रांतांकडून तातडीने टँकर मंजूर केले जात आहेत.
जिल्ह्यात तहानलेली गावे आणि वाड्यांची संख्या 125 वर पोहोचली आहे. या सर्व ठिकाणी 58 टँकरच्या सहाय्याने पाणीपुरवठा केला जात आहे. सर्वाधिक 17 टँकर एकट्या येवला तालुक्यात धावताहेत. त्याद्वारे 45 गावांना पाणीपुरवठा केला जात आहे. बागलाणला 10, तर पेठमध्ये 7 टँकर सुरू आहेत. सिन्नर व सुरगाण्यात प्रत्येकी 6 टँकरचा फेरा सुरू आहे. दरम्यान, गेल्या वर्षी याचकाळात जिल्ह्यात 87 गावांना 42 टँकरद्वारे पाणीपुरवठा केला जात होता.
तहानलेली गावे व टॅंकरसंख्या …
तालुका गावे टँकर
येवला 45 17
बागलाण 19 10
पेठ 13 07
सिन्नर 13 06
सुरगाणा 09 06
चांदवड 08 04
त्र्यंबकेश्वर 08 02
इगतपुरी 06 02
मालेगाव 03 03
देवळा 01 01
एकूण 125 58
धरणांमध्ये 37 टक्के पाणीसाठा
जिल्ह्यात एकीकडे 58 टँकरद्वारे पाणीपुरवठा सुरू असतानाच प्रमुख धरणांमधील साठ्यातही झपाट्याने घट होताना दिसते आहे. प्रमुख 24 धरणांमध्ये आजमितीस 24,130 दशलक्ष घनफूट म्हणजेच 37 टक्के पाणीसाठा शिल्लक आहे. नाशिक शहराला पाणीपुरवठा करणार्या गंगापूर धरणात24,76 दशलक्ष घनफूट पाणी आहे.