घोडेगाव: मढी येथे दर्शनासाठी जात असलेल्या सिन्नर तालुक्यातील (जि. नाशिक) कासारवाडी येथील भाविकांची कार मुळा कालव्यात कोसळून तिघांचा बुडून मृत्यू झाला. या अपघातातून एक जण बचावला. घोडेगाव-सोनई रस्त्यावरील शनैश्वर दूध संघाजवळ बुधवारी (दि. २१) हा अपघात झाला.
प्राथमिक माहितीनुसार, कासारवाडी येथील चार जण कारने (एमएच ०३ बीव्ही ७८८४) मढी येथे दर्शनासाठी जात होते. घोडेगाव-सोनई रस्त्यावर शनैश्वर दूध संघाजवळ कालव्याच्या पुलाजवळ चालकाचे नियंत्रण सुटल्याने कार पुलावरून थेट कालव्यात कोसळली.
या अपघातात भाऊसाहेब कोंडाजी रणधीर, केरू रामभाऊ पवार (वय ७२) आणि सुभाष रामभाऊ बिडवे (वय ५७) यांचा कालव्यात बुडून मृत्यू झाला. कारमधील संदीप सदाशिव कदम हा या अपघातातून बचावला.
अपघाताची माहिती मिळताच स्थानिकांनी घटनास्थळी धाव घेत मदतकार्य सुरू केले. सोनईचे सहायक पोलिस निरीक्षक अनिल मोरे, उपनिरीक्षक किशोर जाधव, सहायक उपनिरीक्षक मच्छिंद्र आडकित्ते, कॉन्स्टेबल सुनील पालवे, वजीर शेख घटनास्थळी दाखल झाले.
क्रेनच्या साह्याने कालव्यातील कार बाहेर काढण्यात आली. तिघांचे मृतदेह बाहेर काढून उत्तरीय तपासणीसाठी नेवासा येथे पाठविण्यात आले. या दुर्घटनेमुळे परिसरात हळहळ व्यक्त होत असून, सोनई पोलिस तपास करीत आहेत.