Akole Poor Road Quality: अकोले तालुक्यात मुख्यमंत्री सडक योजनेतील रस्त्यांचे निकृष्ट काम; ग्रामस्थ संतापित

अकोले: राज्य शासनाने गाव, वाड्या रस्त्याने जोडण्यासाठी, तसेच ग्रामीण भागातील वाहतूक व्यवस्था सुरळीत होण्यासाठी मुख्यमंत्री सडक योजना अंतर्गत कामे घेतली. मात्र, अकोले तालुक्यात कोट्यवधी रुपये खर्चून केलेली कामे अवघ्या अडीच महिन्यात उखडल्याने कामाचा निकृष्ट दर्जा समोर आला आहे. त्यामुळे प्रवाशांमधून संताप व्यक्त केला जात असून, याप्रकरणी चौकशी करून दोषींवर कारवाई करावी, अशी मागणी थेट मुख्यमंत्र्यांपर्यंत पोहचविण्यात आली आहे.

अकोल्यातील गर्दनी बारामती रोड ते मुख्य रस्ता, पिंपळगाव निपाणी ते तालुका हद्द, लिंगदेव ते धुपे रस्ता, हिवरगाव गणोरे ते खातोडे वस्ती, वाघजाळी ते इजीमा 27, मोरेवाडी ते खैरदरा, सांगडेवाडी कुरकुंडी रस्ता, कौठे बु ते वनकुटे रस्ता, एजीमा 18 ते बहिरवाडी या रस्त्याचे काँक्रीटीकरण उखडले आहे. मार्च 2025 मध्ये रस्त्याचे कामाचे खोदकाम, भरावा, खडीकरण, सिमेंट काँक्रीटचे अशाप्रकारे अंदाजे 5 कोटी रुपयांचे अँडव्हान्स पेमेंट कार्यकारी अभियंता यांनी ठेकेदारास दिले, परंतु प्रत्यक्षात बिलामध्ये जेवढी रकमा अदा झाल्या, तेवढी कामे झाली नाही.

दरम्यान, संबंधित निकृष्ट रस्त्यांची कामे पुन्हा न केल्यास प्रत्येक ठिकाणचे ग्रामस्थ अशी बोगस कामे स्वतः उखडून टाकतील, असा इशारा माजी जिल्हा परिषद सदस्य बाजीराव दराडे यांनी दिला आहे.