अमरावती, पुढारी वृत्तसेवा : हवेत गोळीबार करीत नागपूर येथील तरुणीचे अमरावती शहरातून अपहरण करण्यात आले. शहरातील राजापेठ पोलीस ठाण्याच्या हद्दीतील बालाजी प्लॉट येथे ही घटना सोमवारी (दि.७ ) मध्यरात्री घडली. या प्रकरणात राजापेठ पोलिसांनी दोघांना नांदगाव पेठ टोल नाक्यावर ताब्यात घेतले आहे. तरुणीचे अपहरण करणारे पसार झाले आहेत. सिनेस्टाईल घडलेल्या प्रकाराने बालाजी प्लॉट येथील नागरिक धास्तावले आहे. महिला दिनाच्या दिवशी तरुणीचे अपहरण करण्यात आल्याने पुन्हा सुरक्षेचा मुद्दा चव्हाट्यावर आला आहे.
अमरावतीत रात्री बाराच्या सुमारास प्रेयसीला फूस लावून पळवून नेण्यासाठी नागपूरमधील एका प्रियकराने चक्क तरुणीच्या नातेवाईकाच्या डोक्याला बंदूक लावली. हवेत गोळीबार करून प्रेयसीला प्रियकर पळवून घेऊन गेला. ही सिनेस्टाईल घटना अमरावतीत मध्यरात्री घडल्याने खळबळ उडाली आहे.
नागपूरमधील एक तरुणी घरगुती कार्यक्रमासाठी अमरावती शहरातील बालाजी प्लॉटमधील आपल्या नातेवाईकांकडे आली होती. सोमवारी रात्री साडेअकरा वाजताच्या सुमारास सर्व कुटुंबीय जेवण करून बसले होते. तेवढ्यात आरोपी प्रियकर हा अन्य साथीदारासोबत दुचाकी घेऊन तरुणीच्या नातेवाईकांच्या घराजवळ पोहचला. यावेळी त्याने त्याच्या प्रेयसीला सोबत येण्याची गळ घातली होती. पण त्या तरुणीचे नातेवाईक त्याला विरोध करत होते.
यावेळी आरोपी प्रियकराने तरुणीच्या नातेवाईकापैकी एकाच्या डोक्याला बंदूक लावली. जीवे मारण्याची धमकी देत हवेत गोळीबार करून दहशत पसरवली. या संपूर्ण प्रकाराने तरुणीचे नातेवाईक चांगलेच घाबरले होते. याचाच फायदा घेत आरोपी प्रियकर व त्यांच्या साथीदारांनी प्रेयसीला सोबत घेऊन नागपूरकडे पळवून नेले.
त्यानंतर लागलीच तरुणीच्या नातेवाईकांनी पोलिसांना संपर्क केला. यावेळी पोलिसांनी घटनेचे गांभीर्य ओळखून आरोपी व त्यांच्या साथीदारांचा पाठलाग केला. यावेळी पोलिसांनी नांदगाव टोल नाका परिसरातून आरोपी साथीदार प्रफुल दामाये व रमेश अतपाका (रा. नागपूर) यांना अटक केली. आरोपी प्रियकर व त्या तरुणीचा पोलिसांकडून शोध सुरू आहे.
अमरावती शहरात घडलेल्या या घटनेने खळबळ उडाली आहे. हवेत गोळीबार करणारा आरोपी हा गुन्हेगारी प्रवृत्तीचा असल्याची माहिती तरुणीच्या नातेवाइकांनी दिली. या पूर्वीही त्याच्यावर नागपूरमध्ये गुन्हा दाखल असल्याची माहितीही तरुणीच्या नातेवाईकांनी दिली. राजापेठ पोलिसांनी दोघांना अटक केली आहे.
हेही वाचलंत का ?
पहा व्हिडिओ