Iran Mock Donald Trump: अमेरिकेचे राष्ट्राध्यक्ष डोनाल्ड ट्रम्प यांनी संयुक्त राष्ट्राच्या मुख्यालयातून इराणाला नामशेष करण्याची धमकी दिली. ही धमकी इराणने फारशी मनावर न घेता उलट डोनाल्ड ट्रम्प यांचीच चेष्टा केली. डोनाल्ड ट्रम्प यांना डिवचण्यासाठी इराणने तेलुगू चित्रपटातील एक फाईट सीनचा संदर्भ दिला.
झिम्बाब्वेमधील इराणच्या दूतावासाने एका तेलुगू चित्रपटातील क्लीप शेअर करून डोनाल्ड ट्रम्प यांच्या दाव्याचा अन् पोकळ धमकीची थट्टा केली. इराणने ही क्लीप शेअर करत इराण आपल्या देशाचा बचाव करण्यासाठी सक्षम आहे असे सुचित केलं. डोनाल्ड ट्रम्प प्रशासनाने हॉलीवूड चित्रपट पाहण्यापेक्षा बॉलीवूड चित्रपट पहावेत असा सल्ला देखील दिला.
झिम्बाब्वेमधील इराणच्या दूतावासाने एक ट्विट केलं, त्याला तेलुगू अभिनेता नंदमुरी बालकृष्णा यांच्या चित्रपटातील एक गंमतीशीर क्लीप जोडली आहे. या व्हिडिओच्या कॅप्शनमध्ये इराण दूतावास म्हणते की, 'डोनाल्ड ट्रम्प इराणला नेस्तनाभूत करण्याची भाषा करतात. मात्र त्यांना माहिती आहे की इराणकडे भक्कम डिफेन्स आहे. आम्ही त्यांना कळवल्यापासून ते हॉलीवूड चित्रपट पाहण्याऐवजी बॉलीवूड चित्रपट पाहत आहेत.'
डोनाल्ड ट्रम्प यांनी मंगळवारी संयुक्त राष्ट्रांच्या सर्वसाधारण सभेत इराणने शांतता करार केला नाही तर त्यांना नेस्तनाभूत करणार अशी धमकी दिली होती. संयुक्त राष्ट्रात एकादा देश असा उद्ध्वस्त करण्याची ही धमकी देणारे ट्रम्प हे पहिलेच राष्ट्र प्रमुख असावेत.
डोनाल्ड ट्रम्प म्हणाले होते की, 'मला आता मोठा निर्णय घ्यायचा आहे. इराणसोबत डील करायची की त्यांना उद्ध्वस्त करायचं आणि तो देश यापूर्वी कधी नव्हता इतका चांगला करायचा. हा देश कदाचित मध्य पूर्व आशियातील सर्वात चांगला देश किवा जगातील सर्वात चांगाल देश देखील होऊ शकतो.'
ट्रम्प पुढे म्हणाले की, 'नाहीतर मला इस्लामिक रिपब्लिक ऑफ इराणला उद्ध्वस्त करावं लागेल. ते त्वरित करावं लागेल. त्यांना लोकांना मारण्याची संधी न देता ते करावं लागेल.'
दरम्यान इराण आणि अमेरिका यांच्यात ३ तास चर्चा झाली. इराणचे राष्ट्रपती मोसुद पेझेश्कीयन न्यूयॉर्कला जाऊन आले असून ते सभागृहाला देखील संबोधित करणार आहेत. अमेरिका आणि इराण यांच्यातील युद्ध पेटल्यापानंतर ते पहिल्यांदाच सभागृहाला संबोधित करणार आहेत.