पुणे ; पुढारी वृत्तसेवा : दोन वर्षांच्या मुलासह एका महिलेने विहिरीत उडी मारून आत्महत्या केल्याची घटना पुणे-सोलापूर रस्त्यालगत असलेल्या म्हातोबाची आळंदी परिसरात घडली. शुक्रवारी सायंकाळी ही घटना उघडकीस आली.
कविता देवीदास भोसले (वय ३०, सध्या रा. भेकराईनगर, हडपसर, मूळ रा. उमरगा, जि. उस्मानाबाद) आणि दोन वर्षांचा मुलगा प्रसन्नराज (वय. 2) अशी या घटनेत मृत्युमुखी पडलेल्यांची नावे आहेत.
कविता दोन वर्षांच्या मुलासह बेपत्ता झाल्याची तक्रार तिच्या कुटुंबीयांनी हडपसर पोलीस ठाण्यात दिली होती. पोलिसांकडून या प्रकरणाचा तपास करण्यात येत होता.
तांत्रिक तपासात कविता म्हातोबाची आळंदी परिसरात असल्याची माहिती समजली. त्यानंतर लोणी काळभोर आणि हडपसर पोलिसांनी शोध सुरू केला.
म्हातोबाची आळंदी परिसरातील विहिरीतील पाण्यात एक महिला आणि मुलाचा मृतदेह शुक्रवारी सायंकाळी तरंगत असल्याची माहिती स्थानिकांनी दिली.
पोलिसांनी घटनास्थळी धाव घेतली. पाण्यात तरंगणारा मृतदेह कविता आणि तिच्या दोन वर्षांच्या मुलाचा असल्याची खात्री पोलिसांनी पटवली.
कविताने मुलासह आत्महत्या केल्याचा संशय पोलिसांनी व्यक्त केला असून आत्महत्येमागचे कारण समजू शकले नाही
