कुर्डूवाडी : पुढारी वृत्तसेवा नगरविकासमंत्री एकनाथ शिंदे यांनी शिवसेनेला खिंडार पाडत शिवसेनेचे 40 आमदार फोडले, त्यानंतर उद्धव ठाकरे सरकार अल्पमतात आले. राज्यातील शिवसैनिक आक्रमक होत, बंडखोर आमदारांची कार्यालये फोडली. आता कुर्डूवाडीतील शिवसैनिकांनी परंडा येथील आमदार तानाजी सावंत व सांगोल्याचे आमदार शहाजीबापू पाटील यांच्या पोस्टरला काळे फासून पेटवून दिले. यावरून शिवसैनिकांमध्ये एकनाथ शिंदेविरोध रोष नसून आमदार सावंत, पाटील यांच्याविरोधात असल्याचे दिसून आले.
शिवसेनेने अनेक बंड पाहिलेली आहेत. परंतु आत्तापर्यंत झालेल्या सर्व बंडातील हे बंड सर्वात मोठे आहे. राज्यात शिवसेनेची ताकद विधानसभेतील त्यांच्या आमदारावर अवलंबून असते. परंतू असे आमदारच आता शिवसेना व मुख्यमंत्री उद्धव ठाकरे यांच्याविरोधात बंड करून स्वतःचा वेगळा गट करण्याच्या तयारीत आहेत. मुख्यमंत्री शिवसेनेचे उद्धव ठाकरे असताना ते आपल्या आमदारांना संभाळू शकत नाहीत हेच या घटनेवरून दिसून येते आहे. बंडखोर आमदारांच्या विरोधात राज्यात अनेक ठिकाणी आंदोलने होत आहेत. कुर्डूवाडी नगरपालिकेची सत्ता तर गेली पंचवीस वर्षापासून शिवसेनेच्या ताब्यात आहे. गल्लोगल्ली शिवसेनेचे आजी-माजी अनेक नगरसेवक आहेत.
शहरात ठिक-ठिकाणी नगरपालिकेच्या कामाचे ठेकेदार राहात आहेत. शिवसेनेचा एवढा मासबेस असताना कुर्डुवाडी शहरात शिवसेनेच्या प्रत्येक नगरसेवकाच्या वॉर्डात ठिक-ठिकाणी मोठे आंदोलन होणे अपेक्षित होते. परंतु शनिवारी सायंकाळी गांधी चौकात किरकोळ स्वरूपात पन्नास एक शिवसैनिकांच्या उपस्थितीत आंदोलन पार पडले. एकनाथ शिंदे यांच्या नेतृत्वाखाली बंड झालेले आहे. त्यांच्या फोटोला काळे फासून जाळने अपेक्षित होते. परंतु कुर्डूवाडीतील शिवसैनिकांनी जे पोस्टर तयार केले होते. त्यावरून एकनाथ शिंदे यांचा फोटो गायब होता तर आमदार तानाजी सावंत व आमदार शहाजीबापू पाटील यांचे दोनच फोटो होते. हे पाहून तेथील अनेक उपस्थितांनाही आश्चर्याचा धक्का बसला.
आ. तानाजी सावंत व आ. शहाजी पाटील यांच्या पोस्टरला काळे फासून त्यांचे पोस्टर माजी नगराध्यक्ष समीर मुलानींसह अनेकांनी रस्त्यावर टाकून ते तुडवून नंतर त्याला जाळण्यात आले. गद्दारी करणार्या आमदारांच्या विरोधात मोठ मोठ्याने घोषणा देवून आपला निशेध व्यक्त केला. यावेळी नगराध्यक्ष समीर मुलानी, उपनगराध्यक्ष हरी बागल, नगरसेवक दिलीप सोनवर, बाबा साळवे, मनोज धायगुडे, सागर चौधरी यासह शहरातील कुमार गव्हाने, आकाश गव्हाने, किसन हनवते, भारत साळुंके, हरी भराटे, स्वप्नील गवळी, भरतेश समर्थ, विशाल गोरे, सनी खवळे, रमेश परबत, यासीन शेख, महेंद्र मेहता, गोट्या गवळी यांच्यासह शिवसैनिक उपस्थित होते.
राज्यातील शिवसैनिक आक्रमक
शिवसेनेचे आमदार एकनाथ शिंदे यांनी शिवसेनत उभी फूट पाडून 40 आमदार फोडले. त्यानंतर शिवसैनिक आक्रमक होत भूम परंड्याचे आमदार तानाजी सावंत यांचे पुण्यातील कार्यालय तसेच महेश लांडे, सुरेश कुडाळक यांचेही फोडण्यात आले, तसेच सांगोल्याचे आमदार शहाजी बापू पाटील यांच्याविरोधात आंदोलन करण्यात आली. एकूणच राज्यातील शिवसैनिक आक्रमक होत आहेत.
