Yashasvi Jaiswal : शतक हुकले, पण विक्रम नाही! ८५ धावांत यशस्वीने विराटला टाकले मागे; WTC मध्ये मोठी झेप

अवघ्या १५ धावांनी शतक हुकले, तरीही विराटचा विक्रम मोडीत; ऋषभ पंत अद्यापही अव्वल स्थानी कायम
yashasvi jaiswal surpasses virat kohli to set a new wtc record
Yashasvi Jaiswal and Virat Kohli
Published on: 
Updated on: 

वेलिंग्टन : न्यूझीलंडविरुद्धच्या दोन सामन्यांच्या कसोटी मालिकेतील पहिल्याच सामन्यात भारतीय युवा सलामीवीर यशस्वी जैस्वालने आपल्या फलंदाजीचा ठसा उमटवला. शतकाने हुलकावणी दिली असली, तरी त्याच्या ८५ धावांच्या आक्रमक खेळीने अनेक विक्रमांना गवसणी घातली. विशेष म्हणजे, या खेळीसह यशस्वीने जागतिक कसोटी अजिंक्यपद स्पर्धेत (WTC) सर्वाधिक धावा करणाऱ्या भारतीय फलंदाजांच्या यादीत दिग्गज विराट कोहलीला मागे टाकले आहे. त्यामुळे यशस्वीने थेट अव्वल पाचमध्ये स्थान मिळवले असून विराट कोहलीची सहाव्या क्रमांकावर घसरण झाली आहे.

यशस्वीची ८५ धावांची खेळी; विराटचा विक्रम मोडला

न्यूझीलंडविरुद्धच्या पहिल्या कसोटीच्या पहिल्या डावात यशस्वी जैस्वालने सुरुवातीपासूनच आत्मविश्वासपूर्ण फलंदाजी केली. मैदानाच्या चहूबाजूंना फटकेबाजी करत त्याने अवघ्या ८९ चेंडूंत १६ चौकारांच्या मदतीने ८५ धावा फटकावल्या. शतकाच्या उंबरठ्यावर असताना त्याची खेळी संपुष्टात आली; मात्र या खेळीने त्याच्या नावावर आणखी एका मोठ्या विक्रमाची नोंद झाली.

yashasvi jaiswal surpasses virat kohli to set a new wtc record
Mohammed Siraj : प्लेईंग ११ वरून दोन राष्ट्रीय पक्ष भिडले... काँग्रेस खासदाराचे 'सिराज' नावाकडे बोट, भाजपकडून जडेजाचा उल्लेख

यशस्वीच्या नावावर आता जागतिक कसोटी अजिंक्यपद स्पर्धेत एकूण २,६७३ धावा जमा झाल्या आहेत. यासह त्याने विराट कोहलीच्या २,६१७ धावांचा टप्पा ओलांडला. विराटने WTC स्पर्धेत ४६ कसोटी सामने खेळताना ही धावसंख्या उभारली होती. सातत्यपूर्ण कामगिरीच्या जोरावर यशस्वीने आता या दिग्गज फलंदाजालाही मागे टाकले आहे.

ऋषभ पंत अव्वल; तीन हजार धावांचा टप्पा जवळ

जागतिक कसोटी अजिंक्यपद स्पर्धेत भारताकडून सर्वाधिक धावा करण्याचा मान सध्या यष्टिरक्षक फलंदाज ऋषभ पंतच्या नावावर आहे. त्याने आतापर्यंत २,९४८ धावा केल्या आहेत. त्यामुळे तीन हजार धावांचा ऐतिहासिक टप्पा गाठण्यासाठी त्याला आता केवळ ५२ धावांची आवश्यकता आहे. हा टप्पा पार करणारा तो पहिला भारतीय फलंदाज ठरू शकतो.

yashasvi jaiswal surpasses virat kohli to set a new wtc record
KL Rahul NZ vs IND : केएल राहुलचं न्यूझीलंडमध्ये ऐतिहासिक अर्धशतक; भारताच्या कसोटी इतिहासात हे पहिल्यांदाच घडलंय

या यादीत शुभमन गिल २,९१७ धावांसह दुसऱ्या क्रमांकावर आहे. रोहित शर्मा २,७१६ धावांसह तिसऱ्या, तर रवींद्र जडेजा २,६७५ धावांसह चौथ्या स्थानावर आहे. यशस्वी जैस्वालने २,६७३ धावांसह पाचवे स्थान पटकावले असून विराट कोहली २,६१७ धावांसह सहाव्या क्रमांकावर पोहोचला आहे.

WTC मध्ये सर्वाधिक धावा करणारे भारतीय फलंदाज

  1. ऋषभ पंत – २,९४८ धावा

  2. शुभमन गिल – २,९१७ धावा

  3. रोहित शर्मा – २,७१६ धावा

  4. रवींद्र जडेजा – २,६७५ धावा

  5. यशस्वी जैस्वाल – २,६७३ धावा

  6. विराट कोहली – २,६१७ धावा

टीप : ही आकडेवारी वृत्त लिहिताना उपलब्ध असलेल्या माहितीनुसार आहे. आगामी सामन्यांतील कामगिरीनुसार या क्रमवारीत बदल होऊ शकतो.

लोकल ते ग्लोबल बातम्यांसाठी डाऊनलोड करा दैनिक पुढारीचे Android आणि iOS मोबाईल App.

'Pudhari' is excited to announce the relaunch of its Android and iOS apps. Stay updated with the latest news at your fingertips.

Android and iOS Download now and stay updated, anytime, anywhere.