कोलंबो : टी-२० विश्वचषक २०२६ मध्ये ऑस्ट्रेलियन संघाला मोठा धक्का बसला आहे. स्पर्धेतील आपल्या पहिल्याच सामन्यात आयर्लंडविरुद्ध मैदानात उतरण्यापूर्वी कांगारूंचा नियमित कर्णधार मिचेल मार्श दुखापतीमुळे बाहेर फेकला गेला आहे. मार्शच्या अनुपस्थितीत संघाने अनुभवी फलंदाज स्टीव्ह स्मिथचा राखीव खेळाडू म्हणून संघात समावेश करण्याचा महत्त्वपूर्ण निर्णय घेतला आहे.
विश्वचषकाच्या 'ग्रुप-बी' मधील आयर्लंडविरुद्धच्या सामन्यापूर्वी मिचेल मार्शला 'ग्रोइन इंजरी' झाल्याचे समोर आले. त्यामुळे तो या महत्त्वाच्या सामन्याला मुकणार असून, त्याच्या जागी सलामीवीर ट्रॅव्हिस हेडकडे नेतृत्वाची धुरा सोपवण्यात आली आहे. क्रिकेट ऑस्ट्रेलियाने दिलेल्या माहितीनुसार, सरावादरम्यान मार्शला ही दुखापत झाली. स्कॅन अहवालात त्याच्या दुखापतीचे स्वरूप गंभीर असल्याचे स्पष्ट झाले असून, डॉक्टरांच्या सल्ल्यानंतरच त्याच्या पुनरागमनाबाबत निर्णय घेतला जाईल.
मिचेल मार्शच्या दुखापतीची व्याप्ती पाहता, अनुभवी फलंदाज स्टीव्ह स्मिथला पाचारण करण्यात आले आहे. स्मिथने आपला शेवटचा आंतरराष्ट्रीय टी-२० सामना २०२४ च्या अखेरीस खेळला होता. मात्र, नुकत्याच पार पडलेल्या 'बिग बॅश लीग २०२५-२६' मध्ये सिडनी सिक्सर्सकडून खेळताना त्याने उत्कृष्ट कामगिरी केली होती. आता श्रीलंकेतील वातावरणाशी जुळवून घेण्यासाठी तो लवकरच संघात दाखल होणार आहे.
स्पर्धा सुरू होण्यापूर्वीच ऑस्ट्रेलियन संघ दुखापतग्रस्त खेळाडूंच्या समस्येने ग्रासलेला दिसत आहे. आयर्लंडविरुद्धच्या सामन्यासाठी संघाकडे निवडीसाठी केवळ १२ तंदुरुस्त खेळाडू उपलब्ध होते. स्टार वेगवान गोलंदाज पॅट कमिन्स आधीच बाहेर असताना, जोश हेझलवूडच्या जागी अद्याप कोणताही बदली खेळाडू संघात सामील झालेला नाही. अशा परिस्थितीत स्मिथचा अनुभव कांगारूंसाठी मोलाचा ठरणार आहे.
