Stephen Fleming England coach
नवी दिल्ली: चेन्नई सुपर किंग्सला आयपीएलमध्ये मोठे यश मिळवून देणारे स्टीफन फ्लेमिंग आता इंग्लंडच्या कसोटी संघाचे मुख्य प्रशिक्षक म्हणून नवी इनिंग सुरू करणार आहेत. या वर्षाच्या अखेरीस ते ही जबाबदारी स्वीकारणार आहेत. मात्र, पदभार स्वीकारण्यापूर्वीच इंग्लंडचे माजी कर्णधार माइकल वॉन यांनी फ्लेमिंग यांना एका महत्त्वाच्या आव्हानाची जाणीव करून दिली आहे. "फ्लेमिंग हे उत्तम प्रशिक्षक असले, तरी इंग्लंडकडे महेंद्रसिंग धोनीसारखा कर्णधार नाही," असा सूचक इशारा वॉन यांनी दिला आहे.
माइकल वॉन यांनी 'द टेलीग्राफ'मधील आपल्या स्तंभात फ्लेमिंग यांच्या क्षमतेचे कौतुक केले, पण सोबतच एका मोठ्या अडचणीकडे लक्ष वेधले. वॉन यांनी म्हटले आहे की, "स्टीफन फ्लेमिंग हे एक रणनीतीकार आणि कुशल 'मॅन मॅनेजर' आहेत. आयपीएलमध्ये त्यांनी धोनीसोबत मिळून CSK च्या यशाचे उत्तम नियोजन केले. मात्र, इंग्लिश क्रिकेटमध्ये त्यांना एका मोठ्या आव्हानाचा सामना करावा लागेल. आमच्याकडे संघाची धुरा सांभाळण्यासाठी 'एमएस धोनी'सारखा कर्णधार उपलब्ध नाही."
तसेच फ्लेमिंग यांच्यासोबत पूर्वी असलेल्या सपोर्ट स्टाफचा उल्लेख करत त्यांनी लिहिले आहे की, चेन्नईमध्ये एरिक सिमन्स यांच्यासारखे उत्कृष्ट गोलंदाजी प्रशिक्षक त्यांच्या सोबतीला होते. आता इंग्लंडच्या ताफ्यात गोलंदाजीच्या रणनीतीत कसा बदल होतो, हे पाहणे महत्त्वाचे ठरेल.
स्टीफन फ्लेमिंग आणि महेंद्रसिंग धोनी या जोडीने चेन्नईला पाच वेळा आयपीएलचे विजेतेपद मिळवून दिले आहे. मात्र, गेल्या काही हंगामांत संघाची कामगिरी ढासळल्याने फ्रँचायझीने फ्लेमिंग यांच्याशी असलेला करार संपवला. आता इंग्लंडच्या कसोटी संघाला नव्या उंचीवर नेण्याचे मोठे आव्हान त्यांच्यासमोर असेल.
फ्लेमिंग हे इंग्लंडच्या कसोटी संघाचे प्रशिक्षक म्हणून ब्रेंडन मॅक्युलम यांची जागा घेतील; मॅक्युलम हे फ्लेमिंग यांच्याच देशातील, म्हणजेच न्यूझीलंडमधील आहेत. मॅक्युलम २०२२ पासून इंग्लंडचे प्रशिक्षक म्हणून काम पाहत होते. मात्र, पाकिस्तानविरुद्धच्या आगामी कसोटी मालिकेसाठी ते संघासोबत नसतील. या मालिकेसाठी हंगामी प्रशिक्षक मार्कस ट्रेस्कोथिक संघाची धुरा सांभाळतील. दक्षिण आफ्रिकेच्या दौऱ्यापासून फ्लेमिंग संघाची जबाबदारी स्वीकारतील.
