Pakistan Dressing Room Clash Video: टी20 वर्ल्ड कप 2026 मध्ये नामीबियावर विजय मिळवत पाकिस्तानने सुपर-8 मध्ये प्रवेश केला असला, तरी संघाच्या ड्रेसिंग रूममधील एका घटनेने सगळ्यांचे लक्ष वेधून घेतले आहे. कोलंबोच्या सिंहली स्पोर्ट्स क्लबवर झालेल्या या सामन्यानंतर पाकिस्तानच्या कॅम्पमध्ये वातावरण तणावपूर्ण झाल्याचे दिसून आले.
हा सामना पाकिस्तानसाठी ‘करो या मरो’ असा होता. साहिबजादा फरहानने जबरदस्त फलंदाजी करत अवघ्या 58 चेंडूंमध्ये नाबाद शतक झळकावले. त्याला कर्णधार सलमान अली आगा (23 चेंडूंत 38 धावा) आणि शादाब खान (22 चेंडूंत 36 धावा) यांनी साथ दिली. या जोरावर पाकिस्तानने मोठी धावसंख्या उभारली आणि नामीबियावर मात केली.
मात्र सामन्यादरम्यान डगआउटमध्ये घडलेल्या एका प्रसंगाचा व्हिडिओ सोशल मीडियावर व्हायरल झाला आहे. त्या व्हिडिओमध्ये सलमान अली आगा प्रचंड चिडलेल्या अवस्थेत दिसत आहे. त्याच्या शेजारी बाबर आझम शांतपणे बसलेला दिसत आहे. ऑडिओ स्पष्ट नसला तरी सलमान स्वतःच्या खेळावर नाराज असल्याचे जाणवत होते. रागाच्या भरात त्याने पाण्याची बाटली फेकल्याचेही व्हिडिओत दिसत आहे.
ही परिस्थिती पाहून पाकिस्तानचे मुख्य प्रशिक्षक माइक हेसन यांनी सलमानला शांत राहण्याचा इशारा केला. त्यावर सलमानने मान हलवून प्रतिसाद दिला, मात्र त्याचा संताप स्पष्टपणे दिसत होता.
सूत्रांनुसार, सलमान अली आगा बाबर आजमला चौथ्या क्रमांकावर फलंदाजीस न पाठवल्यामुळे नाराज होता, अशी चर्चा आहे. सलमान बाद झाल्यानंतर बाबरऐवजी ख्वाजाला संधी देण्यात आली. मात्र ख्वाजा केवळ 5 धावा करून बाद झाला. त्यानंतर शादाब खान मैदानात उतरला आणि आक्रमक फलंदाजी करत संघाला जवळपास 200 धावांपर्यंत घेऊन गेला. विशेष बाब म्हणजे, टी20 आंतरराष्ट्रीय क्रिकेटमध्ये सर्वाधिक धावा करणाऱ्या बाबर आजमला या सामन्यात फलंदाजीची संधीच मिळाली नाही.
बाबर आजम सध्या खराब फॉर्ममधून जात असल्याचेही दिसून येत आहे. स्पर्धेतील पहिल्या सामन्यात त्याने नेदरलँड्सविरुद्ध फक्त 15 धावा केल्या. अमेरिकेविरुद्ध त्याने 46 धावा केल्या होती. मात्र भारताविरुद्ध तो अक्षर पटेलच्या गोलंदाजीवर क्लीन बोल्ड झाला आणि अवघ्या 5 धावांत माघारी परतला. आता नामीबियाविरुद्ध त्याला फलंदाजीची संधी न मिळाल्याने संघातील अंतर्गत अस्वस्थता आणखी वाढल्याचे चित्र आहे.
दरम्यान, साहिबजादा फरहानच्या शतकाने पाकिस्तानने नवा विक्रम केला आहे. ICC Men's T20 World Cup 2026 मध्ये 2014 नंतर प्रथमच एखाद्या पाकिस्तानी फलंदाजाने शतक झळकावले आहे. याआधी 2014 मध्ये अहमद शहजादने बांगलादेशविरुद्ध नाबाद 111 धावा केल्या होत्या.
एकीकडे सुपर-8 मध्ये प्रवेश करून पाकिस्तानने मोठा दिलासा मिळवला असला, तरी दुसरीकडे ड्रेसिंग रूममधील हा तणाव आणि खेळाडूंमधील नाराजी संघासाठी चिंतेचा विषय ठरत आहे. पुढील सामन्यांपूर्वी संघ व्यवस्थापनाला या अंतर्गत मतभेदांवर तोडगा काढावा लागणार आहे, अन्यथा मैदानाबाहेरील हा वाद मैदानातील कामगिरीवरही परिणाम करू शकतो.
