Ravindra Jadeja 350 Test Wickets : भारतीय संघाचा अष्टपैलू खेळाडू रवींद्र जडेजाने सोमवारी त्याच्या कसोटी कारकिर्दीत आणखी एका ऐतिहासिक टप्प्याला गवसणी घातली. कसोटी क्रिकेटच्या इतिहासात ४,००० हून अधिक धावा आणि ३५० किंवा त्याहून अधिक विकेट घेणारा तो जगातील केवळ चौथा खेळाडू ठरला आहे.
श्रीलंकेविरुद्ध गॅल येथे सुरू असलेल्या पहिल्या कसोटी सामन्याच्या तिसऱ्या दिवशी जडेजाने डावातील आपला दुसरा बळी घेत हा पराक्रम केला. श्रीलंकेच्या केशरा नुवांताने जडेजाचा फिरकी चेंडू ऑफ साईडला मारण्याचा प्रयत्न केला, परंतु चेंडू त्याच्या गुडघ्याला लागून हवेत उडाला आणि शुभमन गिलने सोपा झेल टिपला. या बळीसह जडेजाने ३५० कसोटी विकेटचा टप्पा गाठला.
या कामगिरीसह ३५० कसोटी विकेट घेणारा जडेजा पाचवा भारतीय गोलंदाज ठरला आहे. याआधी अनिल कुंबळे (६१९), रविचंद्रन अश्विन (५३७), कपिल देव (४३४) आणि हरभजन सिंग (४१७) यांनी ही किमया साधली आहे.तत्पूर्वी, भारताच्या पहिल्या डावात जडेजाने १३ धावांचे योगदान दिले होते. भारताचा पहिला डाव ४६२ धावांवर आटोपल्यानंतर, श्रीलंकेने प्रत्युत्तराखल ७ बाद २४३ धावांपर्यंत मजल मारली असून जडेजाने चेंडूने आपली चमक दाखवली.
जडेजाने आतापर्यंत ९० कसोटी सामन्यांमध्ये ४,१०८ धावा आणि ३५० बळी टिपले आहेत. विशेष म्हणजे, १०० पेक्षा कमी कसोटी सामन्यांमध्ये ही दुहेरी कामगिरी (४०००+ धावा आणि ३५०+ बळी) करणारा तो जगातील एकमेव खेळाडू ठरला आहे. तसेच डावखुऱ्या फिरकीपटूंमध्ये जडेजा आता कसोटी इतिहासात सर्वाधिक विकेट घेणाऱ्यांच्या यादीत तिसऱ्या क्रमांकावर पोहोचला आहे. श्रीलंकेचा रंगना हेराथ (४३३) पहिल्या तर डॅनिएल व्हिटोरी (३६२) दुसऱ्या स्थानावर आहे.
जडेजाच्या या कामगिरीमुळे कपिल देव, इयान बॉथम आणि डॅनिएल व्हिटोरी या दिग्गज अष्टपैलू खेळाडूंच्या खास 'एलिट क्लब'मध्ये स्थान मिळाले आहे.
कपिल देव: १३१ कसोटींत ५,२४८ धावा आणि ४३४ बळी (भारतीय दिग्गजांमध्ये सर्वाधिक धावा)
इयान बॉथम (इंग्लंड): १०२ कसोटींत ५,२०० धावा आणि ३८३ बळी
डॅनिएल व्हिटोरी (न्यूझीलंड): ११३ कसोटींत ४,५३१ धावा आणि ३६२ बळी
गेल्या एका दशकात फलंदाजी आणि गोलंदाजी दोन्हीमध्ये सातत्य राखत जडेजा भारतीय कसोटी संघाचा सर्वात महत्त्वाचा आधारस्तंभ बनला आहे. तळाच्या फलंदाजीत महत्त्वपूर्ण धावा जोडणे आणि फिरकीच्या जोरावर प्रतिस्पर्धी फलंदाजांना रोखत गडी बाद करणे, यामुळे संघात उत्तम समतोल राखणे भारताला शक्य झाले आहे.किमान १२५ कसोटी बळी घेणाऱ्या डावखुऱ्या फिरकीपटूंमध्ये जडेजाचा स्ट्राइक रेट ५८.१ असा उत्कृष्ट आहे; या बाबतीत केवळ दक्षिण आफ्रिकेचा केशव महाराज (५६.४) त्याच्या पुढे आहे.श्रीलंकेविरुद्धचा पहिला कसोटी सामना अजून सुरू असल्याने, जडेजाला त्याच्या धावा आणि बळींच्या संख्येत आणखी भर घालून कसोटी क्रिकेटमधील महान अष्टपैलू खेळाडूंमधील आपले स्थान अधिक मजबूत करण्याची सुवर्णसंधी आहे.
