Hyderabad Cricket Team : आगामी रणजी करंडक हंगामातील पहिल्या दोन सामन्यांसाठी मोहम्मद सिराज हैदराबाद संघाचे नेतृत्व करेल, तर सी.व्ही. मिलिंद यांची संघाच्या उपकर्णधारपदी नियुक्ती करण्यात आली आहे, अशी माहिती हैदराबाद क्रिकेट असोसिएशनने प्रसिद्धीपत्रकाव्दारे दिली आहे.
हैदराबादच्या संघात अनुभवी फलंदाज तन्मय अग्रवाल आणि राहुल सिंग यांच्यासह यष्टिरक्षक-फलंदाज राहुल रादेश आणि साई रेड्डी यांचा समावेश आहे. १५ सदस्यांच्या या संघात तनाय त्यागराजन, अनिकेत रेड्डी आणि अजय देव गौड यांचाही समावेश आहे.
सिराज वेस्ट इंडिजविरुद्धच्या मालिकेसाठी भारताच्या एकदिवसीय (ODI) संघात आहे; तीन सामन्यांची ही मालिका ३ ऑक्टोबर रोजी न्यू चंदीगड येथे संपणार आहे. हैदराबादचा रणजी करंडक स्पर्धेतील पहिला सामना ११ ऑक्टोबर रोजी त्रिपुरा विरुद्ध होणार आहे, मात्र त्याचे ठिकाण अद्याप निश्चित झालेले नाही. त्यांचा पुढील सामना १८ ऑक्टोबर रोजी विजयनगरम येथे आंध्र विरुद्ध सुरू होईल. भारताचा न्यूझीलंड दौरा २२ ऑक्टोबरपासून सुरू होत आहे, मात्र या दौऱ्यावर सुरुवातीला टी-२० मालिका खेळली जाणार आहे. सिराजने या फॉरमॅटमध्ये भारतासाठी शेवटचा सामना या वर्षीच्या फेब्रुवारीमध्ये खेळला होता.
भारतीय वेगवान गोलंदाज मोहम्मद सिराजने अलीकडेच कबूल केले की, दोन महिन्यांच्या विश्रांतीनंतर श्रीलंकेच्या दौऱ्यावर त्याला आपला वेग आणि लय (रिदम) पुन्हा मिळवण्यासाठी संघर्ष करावा लागला; मात्र, दुलीप करंडक स्पर्धेत दीर्घ स्पेलमध्ये गोलंदाजी केल्यामुळे त्याला पुन्हा लय मिळवण्यास मदत झाली. श्रीलंकेविरुद्धच्या दोन सामन्यांच्या कसोटी मालिकेत सिराज त्याच्या नेहमीच्या लयीत दिसला नाही. त्याला लय सापडली नाही आणि त्याच्या गोलंदाजीचा वेगही लक्षणीयरीत्या कमी झाला होता. या मालिकेत सिराजने चार डावांत मिळून केवळ ४४ षटके गोलंदाजी केली होती.
