MS Dhoni Ranchi Plot Misuse Notice: भारताचा माजी कर्णधार महेंद्रसिंह धोनीला झारखंड स्टेट हाउसिंग बोर्डाने नियमभंग केल्यामुळे नोटीस बजावली आहे. रांचीतील हरमू रोड परिसरात निवासी वापरासाठी देण्यात आलेल्या प्लॉटचा व्यावसायिक कारणांसाठी वापर होत असल्याचा आरोप बोर्डाने केला आहे.
झारखंड स्टेट हाउसिंग बोर्डाकडून धोनीला काही वर्षांपूर्वी निवासी वापरासाठी एक प्लॉट देण्यात आला होता. अशा प्लॉट्सवर केवळ राहण्यासाठी घर बांधणे आणि त्याचा निवासी वापर करणे ही अट असते. मात्र, त्या जागेचा व्यावसायिक वापर होत असल्याचे दिसून आले आहे, असा दावा बोर्डाने केला आहे.
बोर्डाचे अध्यक्ष संजय लाल पासवान यांनी माध्यमांशी बोलताना सांगितले की, "नियम आणि अटींचे उल्लंघन झाल्याचे प्राथमिक चौकशीत दिसून आले आहे. त्यामुळे धोनीला नोटीस पाठवण्यात आली आहे."
हरमू रोडवरील या मालमत्तेतून डायग्नोस्टिक सेंटर (वैद्यकीय तपासणी केंद्र) चालवले जात असल्याच्या तक्रारी आल्या आहेत. त्यानंतर बोर्डाने या आरोपांची चौकशी सुरू केली. निवासी प्लॉटवर कोणतेही व्यावसायिक सेंटर चालवणे नियमांनुसार बेकायदेशीर आहे. धोनी सध्या रांचीतील रिंग रोडवरील नव्या घरात वास्तव्यास आहे. हरमू रोडवरील घरात तो पूर्वी राहत होता.
बोर्डाने दिलेल्या नोटीसला समाधानकारक उत्तर न दिल्यास संबंधित प्लॉटचा ताबा रद्द करण्याची प्रक्रिया सुरू केली जाऊ शकते, अशी माहिती अधिकाऱ्यांनी दिली आहे. मात्र, अंतिम निर्णय चौकशी अहवाल आणि धोनीकडून मिळालेल्या स्पष्टीकरणावर अवलंबून असेल.
याच परिसरात भाजपच्या राज्य कार्यालयाबाबतही निवासी प्लॉटचा अन्य कारणांसाठी वापर होत असल्याच्या तक्रारी आल्या आहेत. त्या प्रकरणातही बोर्डाने नोटीस दिली असून चौकशी सुरू आहे. या प्रकरणावर महेंद्रसिंह धोनी किंवा त्याच्या प्रतिनिधींकडून अद्याप अधिकृत प्रतिक्रिया मिळालेली नाही. त्यामुळे पुढील घडामोडींवर सर्वांचे लक्ष आहे.
