Asia Cup Trophy Mohsin Naqvi Controversy: दुबईत श्रीलंकेचा 72 धावांनी पराभव करत भारतीय महिला क्रिकेट संघाने आठव्यांदा महिला आशिया कपचे विजेतेपद पटकावले. मात्र, विजयानंतरच्या पुरस्कार वितरण सोहळ्यात भारतीय संघाने पाकिस्तान क्रिकेट बोर्डाचे प्रमुख आणि आशियाई क्रिकेट परिषदेचे (ACC) अध्यक्ष मोहसिन नक्वी यांच्या हस्ते ट्रॉफी स्वीकारली नाही.
अंतिम सामन्यात भारताने श्रीलंकेवर 72 धावांनी दणदणीत विजय मिळवला. या विजयासह हरमनप्रीत कौरच्या नेतृत्वाखालील भारतीय संघाने महिला आशिया कपच्या इतिहासात आपले वर्चस्व कायम राखले. विजयानंतर भारतीय खेळाडूंनी मैदानावर जोरदार जल्लोष केला.
मात्र, त्यानंतर झालेल्या पुरस्कार वितरण सोहळ्यात वेगळंच चित्र पाहायला मिळालं. भारतीय संघाने मोहसिन नक्वी यांच्या हस्ते आशिया कपची ट्रॉफी स्वीकारली नाही.
भारताने विजेतेपद पटकावले त्यावेळी मोहसिन नक्वी स्टेडियममध्ये उपस्थित होते. ते बीसीसीआयचे उपाध्यक्ष राजीव शुक्ला आणि सचिव देवजित सैकिया यांच्यासह अन्य मान्यवरांच्या शेजारी बसलेले दिसले.
सामना संपल्यानंतर नक्वी पुरस्कार वितरणासाठी मंचावरही उपस्थित होते. त्यांनी श्रीलंकेची कर्णधार चमारी अटापट्टू हिला उपविजेत्या संघाचा धनादेश प्रदान केला.
श्रीलंकेला उपविजेत्यांचा धनादेश, पदके आणि स्मृतिचिन्हे देण्यात आली. त्यानंतर चमारी अटापट्टूने फारवेझ महरूफ यांच्याशी संवाद साधला आणि पुरस्कार वितरण सोहळा संपला.
दरम्यान, भारतीय संघाने मात्र नक्वी यांच्या हस्ते विजेतेपदाची ट्रॉफी स्वीकारली नाही. त्यामुळे ट्रॉफी स्वीकारण्याचा कार्यक्रम टाळण्यात आल्याचे दिसून आले. या घटनेचा व्हिडिओ सोशल मीडियावर मोठ्या प्रमाणात चर्चेत आहे.
श्रीलंकेविरुद्धच्या अंतिम सामन्यातील विजयासह भारताने महिला आशिया कपवर तब्बल आठव्यांदा नाव कोरले. त्यामुळे मैदानावरील दमदार कामगिरीसोबतच पुरस्कार वितरणातील या घटनेनेही भारतीय महिला संघाच्या विजयानंतर चर्चेला उधाण आले आहे.
