Vaibhav Suryavanshi IPL Earnings: आयपीएल 2026 मध्ये आपल्या तुफानी फलंदाजीने सर्वांचे लक्ष वेधून घेणारा युवा क्रिकेटपटू वैभव सूर्यवंशी सध्या खेळामुळेच नाही, तर त्याच्या कमाईमुळेही चर्चेत आहे. राजस्थान रॉयल्सकडून खेळणाऱ्या या 15 वर्षीय खेळाडूने रॉयल चॅलेंजर्स बंगळुरुविरुद्ध अवघ्या 26 चेंडूत 78 धावा करत संघाला शानदार विजय मिळवून दिला.
या कामगिरीनंतर त्याच्या उत्पन्नाबाबत उत्सुकता वाढली आहे. वैभव सूर्यवंशीने आयपीएल 2026 साठी राजस्थान रॉयल्ससोबत सुमारे 1.10 कोटी रुपयांचा करार केला आहे. ही त्याची बेसिक कमाई असून, तो प्रत्येक सामना खेळो वा न खेळो, ही रक्कम त्याला मिळणारच आहे.
जर या कराराची विभागणी 14 सामन्यांच्या लीग सिझनमध्ये केली, तर त्याला एका सामन्यामागे साधारण 7.85 लाख रुपये मिळतात. याशिवाय आयपीएलच्या नियमांनुसार प्रत्येक सामन्यासाठी वेगळी मॅच फी दिली जाते, जी सुमारे 7.50 लाख रुपये असते.
यामुळे एका सामन्यासाठी वैभव सूर्यवंशीची एकूण कमाई अंदाजे 15.35 लाख रुपये इतकी होते. एवढ्या कमी वयात इतकी मोठी कमाई करत असल्यामुळे तो सध्या चर्चेचा विषय ठरला आहे.
बिहारमधील समस्तीपूर जिल्ह्यातील ताजपूर गावचा रहिवासी असलेला वैभव एका शेतकरी कुटुंबातून येतो. लहानपणापासूनच वडिलांच्या मार्गदर्शनाखाली त्याने क्रिकेटची सुरुवात केली. स्थानिक अकादमीपासून ते पटना आणि मुजफ्फरपूरपर्यंतचा प्रवास करत त्याने आपल्या कौशल्यात सातत्याने सुधारणा केली.
देशांतर्गत क्रिकेटमध्ये चमक दाखवल्यानंतर आता आयपीएलसारख्या मोठ्या प्लॅटफॉर्मवरही तो आपली छाप पाडत आहे. तज्ज्ञांच्या मते, त्याच्या सध्याच्या कामगिरीनुसार भविष्यात त्याची बाजारातील किंमत आणखी वाढण्याची शक्यता आहे.
एकूणच, मैदानावरील आक्रमक खेळी आणि मैदानाबाहेरील वाढती कमाई यामुळे वैभव सूर्यवंशी हा भारतीय क्रिकेटमधील पुढचा मोठा स्टार होण्याची चिन्हे दिसत आहेत.
