Gautam Gambhir press conference : न्यूझीलंडविरुद्धच्या पाचव्या आणि शेवटच्या टी-२० सामन्यात भारताने पुन्हा एकदा वैभव सूर्यवंशीला अंतिम अकरा खेळाडूंच्या संघात स्थान दिले नाही. ही मालिका आधीच भारताने ३-१ अशी जिंकली असल्याने, हा सामना तसा अनौपचाकिरच होता. १५ वर्षीय वैभव सूर्यवंशीला या मालिकेत केवळ दोन सामन्यात खेळण्‍याची संधी मिळाली होती. मात्र मालिकेतील अखेरीच्‍या सामन्यात त्याला पुन्हा एकदा वगळण्यात आले आहे. यावर आता मुख्य प्रशिक्षक गौतम गंभीर यांनी भाष्य केले आहे.
भारताने शेवटच्या टी-२० सामन्यासाठी आपल्या संघात दोन बदल केले; परंतु वैभव सूर्यवंशीला पुन्हा संधी दिली नाही. सामन्यापूर्वी बोलताना मुख्य प्रशिक्षक गौतम गंभीर यांनी आपल्या निवडीचे समर्थन करताना सांगितले की, माझी जबाबदारी सर्वांना खूश करणे नसून, योग्य निर्णय घेणे ही आहे; मग ते निर्णय लोकप्रिय असोत किंवा नसोत.
गंभीर म्हणाले, "सर्वात पहिली गोष्ट म्हणजे, माझे काम सर्वांना खूश करणे नाही. माझे काम योग्य निर्णय घेणे आहे, लोकप्रिय निर्णय घेणे नव्हे. आणि म्हणूनच मी इथे आहे."
भारतीय संघाचे मुख्य प्रशिक्षक गंभीर यांनी सोशल मीडियाचा प्रभाव आणि खेळाडू निवडीबाबत होणाऱ्या चर्चेवरही भाष्य केले. त्यांनी स्पष्ट केलें की, बाहेरच्या मतांपेक्षा संघाच्या गरजा आणि प्राधान्यक्रम अधिक महत्त्वाचे आहेत. लोकप्रिय निर्णय घेणे खूप सोपे असते. पण माझ्या मते, योग्य निर्णय घेणे आणि ड्रेसिंग रूममध्ये खेळाडूंना सुरक्षिततेची (भक्कम पाठिंब्याची) भावना देणे, हे जास्त महत्त्वाचे आहे.गंभीर यांनी मान्य केले की, भारतीय संघात प्रतिभेची कमतरता नाही, परंतु ज्या खेळाडूंनी दीर्घकाळ सातत्यपूर्ण कामगिरी केली आहे, त्यांना संघात अधिक काळ टिकून राहण्याची संधी मिळायला हवी. संघात खूप प्रतिभा आहे. पण ज्या खेळाडूंनी दीर्घकाळ उत्कृष्ट कामगिरी केली आहे, त्यांना नक्कीच अधिक संधी मिळायला हवी. आम्ही मालिकेच्या नियोजनाकडे याच दृष्टिकोनातून पाहतो, असेही गंभीर यांनी स्पष्ट केले.
सूर्यवंशी या मालिकेत सुरुवातीच्या फळीतील फलंदाज (top-order batter) म्हणून एक पर्याय म्हणून आला होता, परंतु इशान किशनला मांडीच्या दुखापतीमुळे बाहेर बसावे लागल्यानंतरच त्याला संधी मिळाली. पहिल्या सामन्यात तो दुहेरी आकडाही गाठू शकला नाही. तिसऱ्या टी२० सामन्यात त्याने जोरदार पुनरागमन करत ४५ धावांची खेळी केली. या सामन्यात त्याने अभिषेक शर्मासोबत मिळून भारतासाठी 'पॉवरप्ले'मध्ये जागतिक विक्रमी भागीदारी रचली. मात्र, इशान किशन पुन्हा संघात परतल्यामुळे सूर्यवंशीला संघात स्थान मिळाले नाही.
मालिकेतील शेवटच्या सामन्यासाठी भारताने आपला सर्वोत्तम फलंदाजी क्रम कायम ठेवला. संजू सॅमसन आणि अभिषेक शर्मा यांनी सलामी दिली. त्यानंतर इशान किशन, कर्णधार श्रेयस अय्यर आणि तिलक वर्मा फलंदाजीला आले. नितीश कुमार रेड्डी आणि नमन धीर हे अतिरिक्त फलंदाजीचे पर्याय होते, तर भुवनेश्वर कुमार, अर्शदीप सिंग, प्रिन्स यादव आणि वरुण चक्रवर्ती यांनी गोलंदाजीची धुरा सांभाळली. मालिका आधीच भारताच्या बाजूने निश्चित झाल्यामुळे, सूर्यवंशीला पुन्हा संघातून वगळल्याने एक प्रश्न निर्माण झाला आहे की, आंतरराष्ट्रीय स्तरावर प्रस्थापित खेळाडूंनी भरलेल्या संघात उदयोन्मुख खेळाडूंना संधी कशी दिली जाणार आहे? मात्र, गौतम गंभीर यांनी स्पष्ट केले की, खेळाडूंच्या निवडीबाबतचा निर्णय हा वैयक्तिक अपेक्षांपेक्षा संघाच्या हिताला प्राधान्य देऊनच घेतला जाईल.