SL Akshay Karnataka cricketer dies
बंगळूर: कर्नाटकचे माजी वेगवान गोलंदाज एस. एल. अक्षय याचे रविवारी एका क्लब मॅचदरम्यान हृदयविकाराच्या तीव्र झटक्याने निधन झाले. तो अवघ्या ३९ वर्षाचा होता. बंगळूर येथे सुरू असलेल्या कर्नाटक राज्य क्रिकेट संघटना तिसऱ्या श्रेणी लीग सामन्यात अक्षय 'सफायर सीसी' संघाकडून खेळत होता. सामन्यादरम्यान त्याने चार षटके गोलंदाजी केली, परंतु त्यानंतर त्याला अचानक अस्वस्थ वाटू लागले आणि छातीत वेदना होऊ लागल्या.
छातीत जास्त वेदना व्हायला लागल्याने तो मैदानाबाहेर गेला. त्याला तातडीने जवळच्या रुग्णालयात दाखल करण्यात आले; मात्र, उपचारादरम्यान त्याचा मृत्यू झाला. २०१४-१५ च्या हंगामात रणजी करंडक विजेत्या ठरलेल्या कर्नाटकच्या बलाढ्य संघाचा अक्षय एक महत्त्वाचा भाग होता. देशांतर्गत क्रिकेटमध्ये, त्याने आपल्या वेगवान गोलंदाजीच्या जोरावर स्वतःचे एक वेगळे स्थान निर्माण केले होते.
एस. एल. अक्षयची क्रिकेट कारकीर्द फार मोठी नसली, तरी त्याची कामगिरी उल्लेखनीय होती. २०११ ते २०१३ दरम्यान त्याने कर्नाटकचे प्रतिनिधित्व केले.
फर्स्ट क्लास क्रिकेट: ६ सामन्यांत १८ विकेट्स आणि ८९ धावा.
लिस्ट-ए क्रिकेट: ३ सामन्यांत ६ विकेट्स आणि ११ धावा.
टी-२० क्रिकेट: ९ सामन्यांत ८ विकेट्स आणि १० धावा.
क्रिकेटमधून निवृत्त झाल्यानंतरही अक्षयचा खेळाप्रती असलेला उत्साह कमी झाला नव्हता. तो पूर्णवेळ कोचिंग क्षेत्रात सक्रिय होता. कर्नाटकच्या १९ वर्षांखालील संघासोबत काम करत तो युवा खेळाडूंना क्रिकेटचे धडे देत होता आणि राज्यासाठी नवे खेळाडू घडवत होता.
अक्षयच्या निधनावर कर्नाटक राज्य क्रिकेट असोसिएशनने तीव्र दुःख व्यक्त केले आहे. "अक्षयने एक खेळाडू आणि प्रशिक्षक अशा दोन्ही भूमिकांतून कर्नाटक क्रिकेटसाठी मोलाचे योगदान दिले. युवा क्रिकेटपटूंच्या जडणघडणीतील त्याचे कार्य नेहमीच स्मरणात राहील," अशा शब्दांत असोसिएशनने आपल्या भावना व्यक्त केल्या.
