Asian Games 2026 Shooting: आशियाई क्रीडा स्पर्धा 2026 मध्ये भारताच्या महिला नेमबाजांनी शानदार कामगिरी करत 50 मीटर रायफल 3 पोझिशन्स टीम इव्हेंटमध्ये रौप्यपदक जिंकले. तिलोत्तमा सेन, विदार्सा विनोद कोचलुमकल आणि आशी चौकसे या भारतीय त्रिकुटाने पात्रता फेरीत एकूण 1763 गुण मिळवत भारताला रौप्यपदक मिळवून दिले. या स्पर्धेत चीनने 1773 गुणांसह सुवर्णपदक पटकावले. तर कझाकिस्तानने 1754 गुणांसह कांस्यपदक मिळवले.
टीम इव्हेंटमध्ये भारताला रौप्यपदक मिळाले असतानाच तिलोत्तमा सेन आणि विदार्सा विनोद कोचलुमकल यांनी वैयक्तिक स्पर्धेच्या फायनलमध्ये प्रवेश केला आहे.
तिलोत्तमाने सुरुवातीपासूनच सातत्यपूर्ण कामगिरी केली. गुडघ्यावरून नेम साधण्याच्या (Kneeling) आणि आडवे झोपून नेम साधण्याच्या (Prone) फेरीनंतर ती आघाडीच्या तीन नेमबाजांमध्ये पोहोचली. अखेर तिने पात्रता फेरीत 590 गुणांसह तिसरे स्थान मिळवले.
विदार्साची सुरुवात मात्र अपेक्षेप्रमाणे झाली नाही. गुडघ्यावरून नेम साधण्याच्या (Kneeling) फेरीत ती काहीशी मागे पडली. मात्र त्यानंतर तिने जोरदार पुनरागमन केले. Prone आणि Standing फेरीत तिने चांगली कामगिरी करत 588 गुणांसह सहावे स्थान मिळवले. त्यामुळे तिलाही अंतिम फेरीचे तिकीट मिळाले.
आशी चौकसेला वैयक्तिक अंतिम फेरीत स्थान मिळवता आले नाही. Standing फेरीत तिची कामगिरी अपेक्षेप्रमाणे झाली नाही. त्यामुळे ती 585 गुणांसह 15व्या स्थानावर राहिली.
मात्र टीम इव्हेंटमध्ये तिचे योगदान महत्त्वाचे ठरले. तिलोत्तमा, विदार्सा आणि तिच्या गुणांमुळे भारताला एकूण 1763 गुण मिळाले आणि रौप्यपदकही मिळाले .
50 मीटर रायफल 3 पोझिशन्स स्पर्धेत प्रत्येक नेमबाजाला तीन वेगवेगळ्या स्थितींमधून नेम साधावा लागतो. यात Kneeling, Prone आणि Standing या तीन फेऱ्यांचा समावेश असतो.
प्रत्येक खेळाडूने प्रत्येक स्थितीत 20 शॉट्स घेतले. तीन भारतीय नेमबाजांचे एकत्रित गुण टीम इव्हेंटचा निकाल ठरवण्यासाठी वापरले गेले.
वैयक्तिक स्पर्धेत पात्रता फेरीतील पहिल्या आठ नेमबाजांना अंतिम फेरीत स्थान मिळते. मात्र एका देशातून जास्तीत जास्त दोन नेमबाज अंतिम फेरीत पोहोचू शकतात.
चीनच्या हान जियायुने 594 गुणांसह पात्रता फेरीत पहिले स्थान मिळवले. तिलोत्तमा सेन 590 गुणांसह तिसरी, तर विदार्सा 588 गुणांसह सहाव्या स्थानावर राहिली.
टीम इव्हेंटमध्ये रौप्यपदक जिंकल्यानंतर आता भारताचे लक्ष तिलोत्तमा सेन आणि विदार्सा यांच्या वैयक्तिक अंतिम फेरीकडे लागले आहे. दोन्ही भारतीय नेमबाजांकडून आणखी एका पदकाची अपेक्षा आहे.
