Argentina vs England Semi Final 2026 : फिफा २०२६ विश्वचषकाच्या उपांत्य फेरीत इंग्लंडविरुद्ध खेळताना, गतविजेत्या अर्जेंटिनाने आपली प्रसिद्ध आकाशी-निळ्या आणि पांढऱ्या रंगाची जर्सी न वापरता निळ्या रंगाची 'अवे किट' (पर्यायी गणवेश) वापरण्याची परवानगी फिफाकडे (FIFA) मागितली होती. फिफाने उपांत्य फेरीच्या सामन्यांसाठी जर्सीची घोषणा केली आहे. उपांत्य फेरीत अर्जेंटिना इंग्लंडविरुद्ध नेव्ही ब्लू रंगाची अवे जर्सी परिधान करेल.तर अटलांटा स्टेडियमवर होणाऱ्या सामन्यात इंग्लंड आपल्या पारंपरिक पांढऱ्या रंगाच्या होम किटमध्ये मैदानात उतरेल.नेव्ही ब्लू शर्टसोबत अर्जेंटिना काळ्या रंगाची शॉर्ट्स आणि काळे मोजे घालेल, तर इंग्लंड संपूर्ण पांढऱ्या रंगाच्या जर्सीमध्ये असेल.
संपूर्ण विश्वचषक मोहिमेदरम्यान अर्जेंटिनाने आपला पारंपरिक पट्टेदार 'होम शर्ट' (मुख्य गणवेश) वापरण्याला प्राधान्य दिले आहे; केवळ डॅलास स्टेडियमवर जॉर्डनविरुद्धच्या सामन्यात (जो त्यांनी ३-१ असा जिंकला होता) त्यांनी निळ्या रंगाचा पर्यायी गणवेश वापरला होता. आता उपांत्य फेरीत इंग्लंडविरुद्ध खेळताना अर्जेंटिना संघ आपली प्रसिद्ध आकाशी-निळ्या आणि पांढऱ्या रंगाची जर्सी न वापरता निळ्या रंगाची 'अवे किट' (पर्यायी गणवेश) मध्ये मैदानात उतरेल.
इंग्लंडविरुद्धच्या महत्त्वपूर्ण उपांत्य फेरीच्या सामन्यासाठी अर्जेंटिनाची तयारी केवळ नेहमीच्या रणनीतिक सरावापुरती मर्यादित राहिलेली नाही. लिओनेल मेस्सी आपल्या कारकिर्दीत पहिल्यांदाच इंग्लंडचा सामना करण्यास सज्ज होत असताना, अर्जेंटिनाला मानसिक आघाडी मिळवायची आहे. यासाठीच संघ व्यवस्थापनाने फिफाकडे त्यांची 'नेव्ही ब्लू' (गडद निळ्या रंगाची) 'अवे किट' (पर्यायी गणवेश) वापरण्याची परवानगी मागितली. ही विनंती इंग्लंडच्या पारंपरिक पांढऱ्या गणवेशाशी दृश्य पातळीवर चांगला विरोधाभास (कॉन्ट्रास्ट) निर्माण करण्यासाठी करण्यात आलेली नाही, तर त्याऐवी एका प्रभावी ऐतिहासिक आठवणीला उजाळा देण्यासाठी करण्यात आली आहे.
१९८६ च्या विश्वचषकाच्या उपांत्यपूर्व फेरीत अर्जेंटिना आणि इंग्लंड दोन्ही संघ आमनेसामने आले होते. या सामन्यात दिएगो मॅराडोना यांच्या गाजलेल्या "हँड ऑफ गॉड" आणि "गोल ऑफ द सेंच्युरी" मुळे अर्जेंटिनाला २-१ असा विजय मिळाला होता. मेक्सिकोमधील त्या ऐतिहासिक सामन्यात अर्जेंटिनाने आपली 'नेव्ही् ब्लू' रंगाची 'अवे किट' परिधान केली होती. २०२६ मध्येही त्याच रंगाचा गणवेश वापरण्याची विनंती करून, अर्जेंटिनाला त्या ऐतिहासिक लढतीच्या आठवणी जागृत करायच्या आहेत आणि प्रतिस्पर्ध्यांवर मानसिक वर्चस्व मिळवायचे असल्याचे मानले जात आहे.
१९८६ च्या त्या गाजलेल्या सामन्यानंतर, अर्जेंटिना आणि इंग्लंड विश्वचषकात आणखी दोनदा आमनेसामने आले आहेत. १९९८ मध्ये, नाट्यमयरीत्या सामना २-२ असा बरोबरीत सुटल्यानंतर अर्जेंटिनाने पेनल्टी शूटआऊटमध्ये ४-३ असा विजय मिळवला होता. २००२ मध्ये, डेव्हिड बेकहॅमने मारलेल्या एका पेनल्टीमुळे 'थ्री लायन्स'ला (इंग्लंड संघाला) १-० असा विजय मिळाला होता. विशेष म्हणजे, १९९८ चा विजय अर्जेंटिनाने 'नेव्ही ब्लू' रंगाची पर्यायी किट परिधान करून मिळवला होता, तर २००२ मधील पराभव त्यांना त्यांच्या पारंपरिक फिकट निळ्या आणि पांढऱ्या पट्ट्यांच्या गणवेशात पत्करावा लागला होता.
अर्जेंटिनाला पूर्णपणे निळ्या रंगाच्या गणवेशात खेळण्याबाबतचे कारण स्पष्ट झाले नसले तरी विश्वचषकात इंग्लंडविरुद्ध मिळवलेले दोन्ही विजय त्यांनी नेव्ही ब्लू किंवा गडद निळ्या रंगाची जर्सी घातलेली असतानाच मिळवले होते, त्यामुळे हा गणवेश कदाचित 'गुड लक चार्म' (शुभ संकेत) म्हणून पाहिला जात असावा, असे मानले जात आहे.
एक रंजक गोष्ट म्हणजे, १९८६ मध्ये इंग्लंडविरुद्ध अर्जेंटिनाने निळी जर्सी घातली होती, ती प्रत्यक्षात ठरवून घातलेली नव्हती. राउंड ऑफ १६ मध्ये पुएब्ला येथे उरुग्वेविरुद्ध मिळवलेल्या विजयानंतर, कार्लोस बिलार्डोच्या खेळाडूंनी तक्रार केली होती की, तिथल्या उष्ण आणि दमट हवामानामुळे त्यांच्या जर्सी खूप जड होत आहेत.त्यामुळे इंग्लंडविरुद्ध ती जर्सी न वापरण्याचा निर्णय घेण्यात आला, परंतु त्यांचा किट प्रायोजक 'ले कॉक स्पोर्टिफ' ऐनवेळी दुसरी जर्सी तयार करू शकला नाही. यावर तोडगा काढण्यासाठी राष्ट्रीय संघाचे प्रतिनिधी रुबेन मोस्केला आणि एका इक्विपमेंट मॅनेजरने थेट 'तेपितो'च्या बाजारपेठेत धाव घेतली. तिथे त्यांना 'ले कॉक स्पोर्टिफ' जर्सीचे दोन वेगवेगळे सेट घेतले. ते सॅम्पल्स कॅम्पमध्ये आणले गेले, परंतु खेळाडूंचा निर्णय होत नव्हता. अखेर मॅराडोनाने मध्यस्थी करत निळ्या रंगाची जर्सी निवडली. अशा ३८ जर्सी खरेदी करण्यात आल्या, पण त्यावर संघाचा लोगो किंवा खेळाडूंचे नंबर नव्हते. त्यानंतर, १९७८ च्या जुन्या जर्सीवरील लोगो फाडून ते या नवीन जर्सीवर हाताने शिवण्यात आले. तसेच, कोणतेही औद्योगिक कस्टमायझेशन उपकरण उपलब्ध नसल्यामुळे, खेळाडूंचे नंबर एका साध्या इस्त्रीच्या साहाय्याने घाईघाईत जर्सीवर प्रेस करण्यात आले. याचा परिणाम काय झाला? क्रीडा जगताच्या इतिहासातील एक अत्यंत प्रतिष्ठित आणि ऐतिहासिक जर्सी जन्माला आली.
फिफाने उपांत्य फेरीच्या सामन्यांसाठी जर्सीची घोषणा केली आहे. दुसऱ्या उपांत्य फेरीत अर्जेंटिना इंग्लंडविरुद्ध नेव्ही ब्लू रंगाची अवे जर्सी परिधान करेल.तर अटलांटा स्टेडियमवर होणाऱ्या सामन्यात इंग्लंड आपल्या पारंपरिक पांढऱ्या रंगाच्या होम किटमध्ये मैदानात उतरेल.नेव्ही ब्लू शर्टसोबत अर्जेंटिना काळ्या रंगाची शॉर्ट्स आणि काळे मोजे घालेल, तर इंग्लंड संपूर्ण पांढऱ्या रंगाच्या जर्सीमध्ये असेल.
उपांत्यपूर्व फेरीत नॉर्वेवर मात करून इंग्लंडने अंतिम चारमध्ये स्थान मिळवले, तर अर्जेंटिनाने स्वित्झर्लंडचा ३-१ असा पराभव करून आपला विजेतेपदाचा प्रवास कायम ठेवला आहे. अर्जेंटिनाच्या या प्रवासात मेस्सी पुन्हा एकदा केंद्रस्थानी राहिला आहे. आठ वेळा 'बॅलन डी'ओर' (Ballon d’Or) पुरस्कार जिंकलेला मेस्सी या स्पर्धेत सर्वाधिक गोल करणाऱ्या खेळाडूंपैकी एक म्हणून उपांत्य फेरीत उतरत आहे. २०२२ मध्ये कतारमध्ये विजेतेपद मिळवल्यानंतर स्कॅलोनी यांचा संघ सलग दुसऱ्यांदा विश्वचषक जिंकण्याच्या दिशेने वाटचाल करत आहे. विशेष म्हणजे, आंतरराष्ट्रीय स्तरावर मेस्सी पहिल्यांदाच इंग्लंडविरुद्ध खेळणार आहे.
