PSL 2026 controversy
कराची : पाकिस्तान सुपर लीग (PSL) मध्ये गुरुवारी रावळपिंडी आणि इस्लामाबाद युनायटेड यांच्यातील सामन्यादरम्यान मोहम्मद आमिर आणि फहीम अशरफ यांच्यात तीव्र वादावादी झाल्याचे पाहायला मिळाले. कराचीच्या नॅशनल स्टेडियमवर पार पडलेल्या या सामन्यात १७ व्या षटकादरम्यान ही घटना घडली. आमिरने फहीमला बाद केल्यानंतर दोघांमधील वाद विकोपाला गेला.
१६.३ षटकांत इस्लामाबादची अवस्था ७ बाद ९९ अशी असताना आमिरने फहीमला एक आखूड टप्प्याचा चेंडू टाकला. फहीमने तो चेंडू सीमापार धाडण्याचा प्रयत्न केला, मात्र चेंडू त्याच्या बॅटची कड घेऊन यष्टीरक्षक मोहम्मद रिझवानच्या हातात विसावला. पंचांनी बाद असल्याचा निर्णय दिल्यानंतर गोलंदाज आणि फलंदाज यांच्यात शाब्दिक चकमक सुरू झाली.
फहीम मैदानातून बाहेर जाण्यास थोडा उशीर करत असताना आमिरने त्याला काही अपशब्द वापरून मैदानाबाहेर जाण्यास सांगितले. आमिरचे हे वर्तन फहीमला आवडले नाही आणि त्यानेही त्याला सडेतोड उत्तर दिले. रागात असलेला फहीम आमिरच्या दिशेने बॅट दाखवत अंगावर धावून गेल्याचेही दिसले. अखेर रावळपिंडीचा कर्णधार शान मसूद आणि आसिफ आफ्रिदी यांनी मध्यस्थी करत दोघांना वेगळे केले.
प्रथम फलंदाजीसाठी उतरलेल्या इस्लामाबाद युनायटेडची सुरुवातीची फळी पत्त्यासारखी कोसळली आणि संपूर्ण संघ १३७ धावांत गारद झाला. माजी चॅम्पियन संघातर्फे डेव्हॉन कॉनवेने सर्वाधिक ४० धावा केल्या, तर ख्रिस ग्रीनने १६ चेंडूत २९ धावांची फटकेबाजी करत संघाला एका सन्मानजनक धावसंख्येपर्यंत पोहोचवले. रावळपिंडीकडून मोहम्मद आमिरने ४ षटकांत २१ धावा देऊन २ बळी घेतले. शान मसूद आणि डोनोव्हन फरेरा यांनीही प्रत्येकी दोन गडी बाद केले. सलग आठ पराभवांनंतर रावळपिंडीचा संघ आता या मोसमातील पहिल्या विजयाच्या प्रतीक्षेत आहे.
